Sońyna deıin senbep edik - Arystanbek Muhamedıuly Samal Eslıamovanyń jeńisi jaıly
ASTANA. KAZINFORM - Mádenıet jáne sport mınıstri Arystanbek Muhamedıuly Kann festıvalinde eń úzdik áıel róliniń ıegeri ataǵyn jeńip alǵan Samal Eslıamovanyń jetistigin Memleket basshysyna kesh jetkizgenin moıyndady, dep habarlaıdy QazAqparat tilshisi.
«Kann festıvalinnen Samal Eslıamovanyń basty júldeni jeńip alýy osy jyldyń aıtýly jetistikteriniń biri boldy. Tipti mynadaı jaǵdaı boldy - juma kúni edi, al biz mundaı iri jetistikti Memleket basshysyna birden jetkizýimiz kerek bolatyn. Álbette, Memleket basshysy qýana-qýana ıegerdi quttyqtaıdy. Biraq, kúttik. Tek kelesi aptanyń seısenbisinde ǵana Prezıdent Ákimshiligine Samal Eslıamovanyń Kann festıvalinde basty júldeni alǵany týraly aqparatty jetkizdik. Basshylyqtyń bári de nelikten arada 5 kún ótkennen keıin aqparatty berip jatyrsyzdar dep aıtyp jatty. Shynyn aıtaıyn, ózim senbep edim. Juma, senbi, jeksenbi - Eýronıýsty, barlyq arnalardy kórip otyrmyz. Bir oıym - bálkim, ol kórermenderdiń kózaıymy atanǵan shyǵar, bálkim tóreshilerdiń syılyǵyna ıe boldy ma dedim. Sebebi, bizdiń aktrısanyń basty júldeni alýyna senbep edim. Tipti búkil mınıstrlik bolyp jańalyqty baqylap otyrdyq», - dedi mınıstr Úkimettiń baspasóz ortalyǵynda ótken brıfıng barysynda.
Arystanbek Muhamedıulynyń aıtýyna qaraǵanda, juma kúni vedomstvo Kann festıvaliniń uıymdastyrýshylaryna saýal hat joldaǵan. Ol hatqa aqparatty resmı saıttan kórýge bolatyny týraly jaýap kelgen.
«Tek seısenbide tolyq senimdi bolǵan kezde ǵana aqparatty joldadyq. Bul óte joǵary jetistik. Postkeńestik elderdiń ishinde Kann festıvaliniń mundaı júldesin birde-bir akter alǵan emes. Ol júldeni kerek deseńiz jasqanbaı óner salasyndaǵy Nobel syılyǵyna teńeýge bolady. Nobel syılyǵyn ádebıet úshin beretinin eskersek, óner salasyndaǵy eń joǵarǵy jetistik Kann festıvaliniń júldesi», - dedi Arystanbek Muhamedıuly.
Mınıstr 2019 jyldyń 6 qańtarynda Samal Eslıamova men rejısser Sergeı Dvortsevoı Los-Anjeleske ushatynyn habarlady.
Aıta ketsek, jaqynda «Aıka» fılmi amerıkalyq «Oskar» kınosyılyǵynyń short-paraǵyna engen bolatyn.
Álbette, mınıstr atap ótkendeı, bıylǵy jyl qazaq aktrısasy Samal Eslıamovanyń Kann festıvalin baǵyndyrýymen este qalary anyq.
Samal 71 Kann kınofestıvalinde óz atalymy boıynsha úzdik dep tanylǵan bolatyn. Aktrısa reseılik rejısser Sergeı Dvortsevoıdyń «Aıka» atty kartınasynda basty róldi somdaǵan.
