Sonıa Jıenbaeva Túrkııadaǵy týrnırdiń chempıony atandy

ASTANA. KAZINFORM - Qazaqstandyq 18 jastaǵy tennısshi Sonıa Jıenbaeva Antalııa (Túrkııa) ITF W15 týrnıriniń fınalynda jeńiske jetip, chempıon atandy. 

Dúnıejúzilik reıtıngide 1 246-orynda turǵan qazaqstandyq tennısshi álemniń 525-raketkasy, túrkııalyq Iorýk Ilaımen bas júldeni sarapqa saldy.

Jıenbaeva tartysty ótken básekede 7:6 (7:4), 6:4 esebimen jeńiske jetti. Osylaısha, Sonıa eresekter arasynda ITF jarysyndaǵy alǵashqy tıtýlyna qol jetkizdi.

«Búgin men úshin osy maýsymdaǵy mańyzdy kún dep esepteımin. Apta boıy qıyn matchtar ótkizdim. Psıhologııalyq jaǵynan da daıyn bolǵanyma óte qýanyshtymyn. Bárińizge qoldaýyńyz úshin alǵys aıtamyn», - dedi S. Jıenbaeva.

Sonıa jasóspirimder arasynda álemdik reıtıngide 31-satyda tur. Al WTA reıtıngisinde 15 sáýirde 1 000 tennısshiniń qataryna kiredi. 

Eske sala keteıik, budan buryn Denıs Evseevtiń Barselona týrnıriniń irikteý satysyn sátti bastaǵanyn jazǵan bolatynbyz.