Sonıa Jıenbaeva Qytaıdaǵy týrnırde jarystyń 1-raketkasyn jeńdi
ASTANA. KAZINFORM – Qazaqstandyq tennısshi, 19 jastaǵy Sonıa Jıenbaeva Ýnın (Qytaı) ITF W100 týrnırin sátti bastady.
Qazaqstandyq sportshy alǵashqy aınalymda álemniń 189-ynshy, osy jarystyń 1-raketkasy, qytaılyq Esın Maǵa tap keldi.
Qarsylasynyń favorıt bolǵanyna qaramastan, Sonıa aıqyn basymdylyq tanytty – 6:3, 6:1. Báseke 1 saǵat 15 mınýtta aıaqtaldy.
Sonıa Jıenbaevanyń kelesi qarsylasy keıin belgili bolady.
Bir apta buryn S.Jıenbaeva osy Ýnındegi ITF W50 dodasynda shırek fınalǵa deıin jetken bolatyn. Sonyń nátıjesinde keshe jańartylǵan WTA reıtıngisinde 1 037-den 902-orynǵa kóterildi.
Ótken aptada Kaıserı (Túrkııa) ITF W15 týrnıriniń shırek fınalyna deıin jetken taǵy bir qazaqstandyq, 20 jastaǵy Asyljan Arystanbekova da álemdik reıtıngide 1 047-den 953-satyǵa shyqty.
Eske sala keteıik, budan buryn Rolan Garrostan keıin Býblık úshin Shtýtgart týrnırindegi jaǵdaı qalaı órbýi múmkin ekenin jazǵan edik.
