Sony Pictures stýdııasynyń «Venom: sońǵy bı» fılmi qazaq tilinde kórsetiledi
ASTANA. KAZINFORM – Tanymal týyndylardy qazaqsha sóıletken álemdik stýdııalar qatary tolyqty. Disney men Pixar stýdııalarynyń qazaq tilin qoldaý bastamasyn Sony Pictures kompanııasy jalǵastyrdy. 24 qazannan bastap «Venom. Sońǵy bı» (Venom: The Last Dance) fantastıkalyq ekshn týyndysy kınoteatrlarda qazaq tilinde kórsetile bastaıdy. Álemdik úzdik fılmdi «Qazaq tili» qoǵamynyń usynysymen Sony Pictures óz qarajatyna aýdaryp, dýblıajdady.
Bul – «Venom» trılogııasynyń qorytyndy bólimi. Marvel komıksterine negizdelgen. Alǵashqy eki bólimi úlken qyzyǵýshylyq týdyrdy. Basty róldi teńdessiz Tom Hardı somdaıdy. Bul joly Eddı men Venom dostasyp, zulymdarmen birge kúresedi.
«Sony Pictures kompanııasynda dýblıaj ben lokalızatsııa árdaıym halyqaralyq marketıng strategııasynyń ajyramas bóligi bolatyn. Burynnan kele jatqan seriktesimiz, «Meloman» kompanııasymen birlesken jumysymyzdyń arqasynda, franshızanyń jańa bólimi «Venom: Sońǵy bı» týyndysynda Venom qazaq tilinde sóıleıtinine qýanyshtymyz», - deıdi Sony Pictures kompanııasynyń halyqaralyq marketıng jónindegi vıtse-prezıdenti Natalııa Grymova.
Al MARWIN/Meloman bas dırektory Vadım Golenko Gollıvýd stýdııalarynyń qazaq tilin damytýǵa belsendi úles qosyp jatqanyn aıtty.
«Bıyl Qazaqstannyń úlken ekrandaryna jańa «Venom: Sońǵy bı» blokbasterin shyǵaramyz. Dybystalǵan fılmder tek kóńil kótermeıdi, sondaı-aq olardyń orasan zor tanymdyq áleýeti bar. Elestetip kórińizshi, súıikti sýperqaharmandar sizge jaqyndaı túsedi. Venomnyń ózi ana tilińizde sóıleıdi. Bul ǵajap qoı! Al stýdııalarǵa kórermenderdiń qazaq dýblıajyna degen súıispenshiligin kórsetip, kelesi jyly qazaq tilinde shyǵatyn dýblıajdar men ǵajaıyp shytyrman týyndylardy kútemiz», - dedi ol.
Óz kezeginde Halyqaralyq «Qazaq tili» qoǵamynyń prezıdenti Raýan Kenjehanuly kópshilikti qazaq tiline aýdarylyp jatqan fılmderdi keńinen nasıhattaýǵa, kınoteatrlarǵa baryp, qazaq dýblıajyn qoldaýǵa shaqyrdy.
«Álemdik stýdııalardyń qazaqtildi ortanyń qyzyǵýshylyǵyn eskerip, týyndylaryn óz esebinen aýdaryp, usynýy – biz úshin óte jaqsy jańalyq. Bıylǵy álemdik premeralardyń qazaq tilindegi aýdarmasy buryn-sońdy bolmaǵan rekordtyq kórsetkishterge jetti. Qazaqsha kıno qaraýǵa yqylasty qaýymnyń kóbeıgeni anyq baıqaldy. Aldaǵy ýaqytta tanymal týyndylardy qazaq tiline aýdarý dástúri jalǵasa beredi. Bul tilimizdiń, ásirese, balalar men jastar úshin tartymdylyǵyn arttyrýǵa jáne keńinen taratýǵa baǵyttalǵan tıimdi tásil dep sanaımyn», - deıdi Raýan Kenjehanuly.
Buǵan deıin Disney, Pixar syndy halyqaralyq stýdııalar álemdik tanymal týyndylaryn óz esebinen qazaq tiline aýdaryp, kásibı dýblıaj jasady. «Oıjumbaq 2» fılmi alǵashqy 4 kúnde 40 000 000 teńgeden astam qarajat jınap, buǵan deıin kórsetilgen týyndylar arasynda rekord ornatty. Qyrǵyzstan, Armenııa, Grýzııa, Ázerbaıjan, Ózbekstan, Tájikstan elderi arasynda Qazaqstan jınalǵan soma boıynsha birinshi orynda turdy.
Aıta keteıik, qazaq tilindegi dýblıajdy qazaqstandyq Movie Dalen dýblıaj stýdııasy jasady.
