Sony kompanııasy endi PlayStation oıyndaryna arnalǵan dıskilerdi shyǵarmaıdy
ASTANA. KAZINFORM — Sony Interactive Entertainment 2028 jyldan bastap PlayStation konsolderine arnalǵan barlyq jańa oıyndardy tek tsıfrlyq formatta shyǵarady. Osylaısha kompanııa jańa oıyndarǵa arnalǵan dıskilerdi óndirýdi toqtatpaq, dep habarlaıdy Kyodo.
Kompanııanyń kontenttik kommýnıkatsııalar jónindegi dırektory Sıd Shýman óz málimdemesinde bul sheshim tutynýshylardyń suranysyna saı qabyldanǵanyn aıtty.
— Bul — Sony Interactive Entertainment úshin damý baǵyty. Óıtkeni tutynýshylardyń tsıfrlyq kontentke degen suranysy fızıkalyq dıskilerge qaraǵanda áldeqaıda joǵary, — dedi ol.
Onyń aıtýynsha, bul ózgeris 2028 jyldyń qańtaryna deıin dıskide shyǵarylǵan nemese sol ýaqytqa deıin shyǵatyn oıyndarǵa áser etpeıdi.
Sońǵy jyldary oıynshylardyń talǵamy ózgerip, kópshilik oıyndardy júktep alý nemese smartfon qosymshalary arqyly onlaın qoljetimdi etý tásilin tańdaı bastady.
Kompanııanyń naýryz aıyndaǵy oıyn baǵdarlamalyq jasaqtamasynyń satylymy 2,64 trln ıen (16,4 mlrd dollar) boldy. Onyń ishinde fızıkalyq dıskilerdiń úlesi jalpy satylymnyń 5 paıyzynan da az bolǵan.
Aıta keteıik, Sony avtorlyq quqyqty saqtaý úshin mýzykanttarǵa jańa tehnologııa usyndy.
