Sońǵy jyldary elimizdegi munaı qubyrlarynan ónim urlaý faktileri ósip otyr

Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine munaı jáne munaı ónimderiniń aınalymy salasynda memlekettik baqylaýdy kúsheıtý máseleleri boıynsha ózgerister men tolyqtyrýlar engizý týraly» zań jobasy boıynsha baıandama jasaǵan depýtat Valerıı Kotovıch osylaı málim etti, dep habarlaıdy QazAqparat.

«Shet eldik memleketterdiń tájirıbesine qaraǵanda, munaı ónimderiniń aınalymyna memlekettik baqylaý kúsheıip, qatań sharalar der kezinde qolǵa alynbasa, zańsyz qarjy tabýdyń kózi bolyp sanalatyn bundaı qylmystyń sany da arta beredi. Sonymen birge, elimizde munaı qubyrlaryna sanktsııalanbaǵan oıyqtar ornatý arqyly jasalatyn munaı urlaý qylmysynyń sany da jyl ótken saıyn ósip otyr. Máselen, 2001-2004 jyldary aralyǵynda «QazTransOıl» AQ-nyń magıstraldy munaı qubyrlarynda munaı urlyǵyna qatysty birde bir fakti tirkelmese, 2005 jyly bundaı 43 qylmys jasalǵan. Al 2006 jyly 44 munaı urlyǵy, 2007 jyly - 74, 2008 jyly - 132, al 2009 jyly - 148 urlyq jasalǵan», dedi V. Kotovıch.

Depýtattyń aıtýynsha, magıstraldy munaı qubyrlaryna kúzetti kúsheıtýge qatysty qabyldanǵan sharalarǵa qaramastan bul saladaǵy problemalyq máseleler kúnnen kúnge nasharlap barady.

«Urlanǵan munaı satylady, munaı termınaldaryna ótkiziledi, shaǵyn zaýyttarda óńdelip, satýǵa qaıta shyǵarylyp otyrady. Sondyqtan da, zań jobasy boıynsha munaı ónimderiniń zańsyz tasymalyna, bundaı ónimdi zańsyz ıelenýge, saqtaýǵa, sondaı-aq óńdeýge qatysty ákimshilik jáne qylmystyq jaýapkershilik belgilenedi», V. Kotovıch.