Sońǵy jyldary elimizde balalar úıindegi jetimder sanynyń tómendeýi baıqalyp otyr
ASTANA. 23 qańtar. QazAqparat - QR Bilim jáne ǵylym mınıstrliginiń málimdeýinshe, respýblıkada jetim balalar men ata-anasynyń qamqorlyǵynsyz qalǵan balalar sanynyń azaıýynyń oń úrdisi baıqalýda.
«Eger 2009 jyly atalǵan balalardyń sany 42 494 bala bolsa, 2011 jyly olardyń sany 5 717 balaǵa azaıdy. Al búgingi kúni respýblıkada 36 777 jetim bala jáne ata-anasynyń qamqorlyǵynsyz qalǵan bala bar», - delingen vedomstvo derekterinde.
Atalmysh jaqsy úrdis balalar úılerinde de baıqalýda. 3 jyldyń ishinde jetim balalar men ata-anasynyń qamqorlyǵynsyz qalǵan balalarǵa arnalǵan uıymdardaǵy tárbıelenýshilerdiń sany 2 191 balaǵa azaıdy.
Bul oń isterdiń uıytqysy - balalardyń quqyǵyn qorǵaý komıtetiniń jáne onyń aımaqtardaǵy departament jumystarynyń nátıjesi. Ata-anasynyń qamqorlyǵynsyz qalǵan balalarmen árdaıym kezdesýler uıymdastyrý, olardy qonaqqa shaqyrý, qamqorshylarǵa kómek qolyn sozý, patronat-otbasylaryna kómektesý jaqsy áleýmettik nátıje berdi.
«Sondaı-aq, ulttyq zańnamaǵa sáıkes bala asyrap alý máselesinde basymdyqtyń qazaqstandyq azamattarǵa berilýi de úlken mańyzǵa ıe. 2011 jyly Qazaqstannyń azamattary 3 219 bala asyrap aldy, bul 2010 jylmen salystyrǵanda 119 balaǵa kóp. Sonymen qatar, bolashaq asyrap alýshy azamattar retinde bizdiń 1380 azamatymyz tirkeldi, bul ótken jylǵa qaraǵanda 332 adamǵa artyq. Baqytty balalar kóbeıýde. Bul - kóńilge qýanysh uıalatady», - delingen mınıstrlik málimetterinde.
