Sońǵy jekpe-jegimde 200 myń dollardan astam qarjy taptym – Shavkat Rahmonov

ASTANA. QazAqparat – Taıaýda ǵana Las-Vegasta ótken UFC 285 aralas jekpe-jek básekesinde jeńiske jetken otandasymyz Shavkat Rahmonov Jibek Joly telearnasyndaǵy «Túngi stýdııa» Nurlan Qoıanbaevpen baǵdarlamasynda qonaq boldy, dep habarlaıdy QazAqparat tilshisi.

«Bul meniń ǵana emes búkil qazaq halqynyń jeńisi. Jeńiske jetkenime halqym qýanyp jatyr. Amerıkada qazaqtyń kók týyn jelbiretý, qazaq tilinde sóz sóıleý men úshin úlken baqyt ári shabyttandyrady. Armanym - UFC belbeýin Qazaqstanǵa ákelý. Qudaı buıyrtsa ony da elge ákelemiz. Sońǵy qarsylasym UFC-diń úzdik ondyǵyna kirgen Djeff Nıl boldy. Shynyn aıtý kerek, jekpe-jek barysynda ekeýisiz de sharshadyq, ol da, men de soqqy ótkizdik. Tartysty jekpe-jek boldy. Nátıjesinde qylqyndyrý ádisimen jeńdim. Ony jekpe-jekke shaqyrǵanymda «jeńemin» dep oılaǵan sııaqty. Biraq, qatelesti. Qazir men álem boıynsha UFC-diń úzdik ondyǵynda 6-orynda turmyn», - dedi sportshy baǵdarlama barysynda.

Sonymen qatar ol jekpe-jekterdegi jeńisi úshin baǵaly syılyq tartý etken azamattardyń bolǵanyn atap ótti.

«Syılamasa da rızamyz, shyn júrekten qoldaý bildirse bolǵany. Bireýden syılyq kútpeımiz, sportta ol úshin júrgenimiz joq. Tapqan tabysymyz da jetedi. Bizden góri jastarymyzǵa qoldaý bildirse durys bolar edi. Tabysymyz ózimizge jetedi. Sońǵy jekpe-jegimde tapqan tabysym 200 myń dollardan asady. Qolymyzdan kelgenshe aqshany syrtqa shyǵarmaı elge ákelip jatyryz», - dedi Shavkat Rahmonov.

Shavkat Rahmonov jas sportshylarǵa da óziniń aqyl-keńesin berdi.

«Rejım saqtap, asyqpańyzdar. Asyqqan kezde qatelikter oryn alýy múmkin. Esh ýaqytta asyqtaı kútińizder. Kúte bilińizder, shydam da bolýy kerek», - dedi sportshy.

Aıta keteıik, 5 naýryzda Shavkat Rahmonov amerıkalyq belgili faıter Djeff Nıldi (15-4) úshinshi raýndta ony qylqyndyrý ádisimen jeńgen bolatyn.