Sońǵy úsh jylda notarıýstarǵa qatysty 63 qylmystyq is qozǵaldy

Búgin QR Parlamenti Senatynyń jalpy otyrysynda «Notarıat týraly» QR zań jobasyna ózgerister men tolyqtyrýlar engizý týraly» zań jobasyn talqylaý barysynda depýtattardyń saýalyna jaýap bergen Ádilet mınıstri Rashıd Túsipbekov osylaı málimdedi. Esterińizge sala keteıik, atalǵan zań jobasyn Senat birqatar ózgerister engizip Májiliske qaıtardy.

Ádilet mınıstri Rashıd Túsipbekovtyń aıtýynsha, búgingi kúni notarıýstyq qyzmetti jetildirýge qatysty ákimshilik kedergilerdi alyp tastaý sharalary júzege asyp jatyr. Degenmen, mınıstr notarıaldyq qyzmetter azamattardyń quqy men múddesine tikeleı aralasatynyna erekshe toqtalyp, bul baǵytta arnaıy tekserýlerdiń bolýy kerektigin de eske saldy. «Árıne, aldaǵy ýaqytta da bundaı tekseristerdi azaıtýǵa qadam jasaıtyn bolamyz. Alaıda ókinishke qaraı, tájirıbege súıensek, notarıýstar tarapynan zań buzýshylyqtar da bolyp turady. Máselen, sońǵy úsh jylda osy salaǵa qatysty 63 qylmystyq is qozǵaldy. Zań buzýshylyqtary úshin lıtsenzııalary qaıtyp alynǵan nemese toqtatylǵandardyń sany 190-ǵa jetedi. Sondyqtan da, notarıýstardyń qyzmeti bizdiń azamattarymyzdyń quqy men múddesine tikeleı qatysty ekenin esten shyǵarmaý kerek», - deıdi R. Túsipbekov.