Sońǵy úsh jylda kásiptik-tehnıkalyq bilim salasyna baǵyttalǵan qarajat eki esege artty - Bilim mınıstri
ASTANA. QazAqparat - Sońǵy úsh jylda elimizdegi kásiptik-tehnıkalyq bilim berýge baǵyttalǵan bıýdjet qarajaty eki esege artyp otyr. Búgin Senatta orta tehnıkalyq jáne kásiptik bilim berý júıesiniń bolashaǵyna arnalǵan ǵylymı-tájirıbelik konferentsııa barysynda Bilim jáne ǵylym mınıstri Aslan Sárinjipov osylaı málim etti.
«Qazirgi tańda elimizdiń 850 kolledjinde 560 myńnan astam stýdent bilim alýda. Jyl saıyn 180 myń túlek eńbek naryǵyna shyǵady. Olardyń 70 paıyzdan astamy birinshi jyldyń ishinde óz kásibi boıynsha jumysqa ornalasady», - deıdi Aslan Sárinjipov.
Onyń aıtýynsha, sońǵy jyldary Qazaqstanda kadr daıarlaý máselesin sheshý úshin bilim salasyna bólingen qarajat mólsheri edáýir artqan. Máselen, bul kórsetkish 2014 jyly 1 trln. 497 mlrd teńgeni qurady.
«Al sońǵy úsh jylda kásiptik-tehnıkalyq bilim salasyna baǵyttalǵan bıýdjet qarajaty eki esege artty. Kolledjderdegi sheberhanalardy jabdyqtaýǵa arnalǵan qarajat 6 esege ulǵaıtyldy. 2014 jyly 200-den astam sheberhana men zerthanalardy jabdyqtaýǵa 5,5 mlrd. teńge qarastyrylyp otyr», - dedi mınıstr.
