Sońǵy úsh jylda elimizdegi qylmystylyq 4,6 paıyzǵa tómendegen - QR ІІM
ASTANA. QazAqparat - Sońǵy úsh jylda elimizde qylmystylyq 4,6 paıyzǵa tómendegeni baıqalady. Búgin Májiliste Qylmystyq-atqarý júıesindegi máselelerge arnalǵan Úkimet saǵatynda QR Іshki ister mınıstri Qalmuhanbet Qasymov málim etti.
«Búgingi tańda elimizdegi krımınaldyq ahýal turaqty. Sońǵy jyldary qylmystardy tirkeýdi qatańdatý nátıjesinde elimizdiń qylmystyq jaǵdaıynyń aıqyn statıstıkasy qalyptasa bastady. Aǵymdaǵy jyly ishki ister jelisimen 249 myń qylmys tirkeldi. Sonyń nátıjesinde sońǵy úsh jylda alǵash ret qylmystardyń 4,6 paıyzǵa tómendegeni baıqalady», - dedi mınıstr.
Onyń aıtýynsha, aýyr jáne asa aýyr qylmystar kórsetkishi tómendegen, kisi óltirý, tonaý kórsetkishteri de azaıǵan.
«Degenmen, urlyq qylmysy áli de elimizdiń krımınogendik ahýalyna áser etip otyr. Onyń qylmystylyq qurylymyndaǵy úlesi alpys paıyzdan asady. Sonymen qatar qylmystardyń barlyq túrleri boıynsha ashylý kórsetkishi jaqsarǵan», - dedi Q.Qasymov.
