Sońǵy úsh jylda elimizdegi kıikterdi qorǵaý sharalaryna jyl saıyn 200 mln. teńge bólinip keledi
qpannyń 10-y. QazAqparat /Qanat Mámetqazyuly/ - Sońǵy úsh jylda elimizdegi kıikter sanyn arttyryp, olardy qorǵaý sharalary úshin jyl saıyn 200 mln. teńge bólinip keledi. Bul týraly búgin QR Aýyl sharýashylyǵy mınıstrligi Orman jáne ań sharýashylyǵy komıtetiniń uıymdastyrýymen Qazaqstandaǵy kıikterdiń bıoalýandyǵyn saqtaý taqyrybynda dóńgelek ústel jıyny barysynda málim boldy,
dep habarlaıdy QazAqparat.
«Búgingi kúni elimiz aýmaǵynda jaıylatyn kıikterdiń esebin júrgizý Bilim jáne ǵylym mınıstrliginiń Zoologııa ınstıtýty tarapynan ázirlengen ádistemeler arqyly júrgiziledi. Esepke alýdyń bul túri halyqaralyq sarapshylar tarypan da qoldaý tapqan. Sonymen birge, qazirgi tańda Aýyl sharýashylyǵy mınıstrligi kıikterdiń taralymyn saqtaý úshin halyqaralyq yntymaqtastyqqa baǵyttalǵan sharalardy júzege asyryp otyr. Máselen, Túrikmenstan Úkimetimen kıikterdi saqtaý jáne olardyń kóbeıýine jaǵdaılar jasaý jóninde kelisimge qol qoıyldy. Reseı jáne Ózbekstan ederimen úkimetaralyq kelisimder jobasy ázirlengen. Bundaı halyqaralyq yntymaqtastyqtyń qajettiligi aıqyn, óıtkeni aqbókender órisi, olardyń jaıylatyn, qystaıtyn mekenderi Qazaqstannyń aýmaǵynan shyǵyp, kórshiles memlekettermen de aralasyp jatady. Kıikterdiń jaılap júrgen oryndary, jaıylý baǵyttary týraly naqty aqparattar alý úshin spýtnık arqyly baqylaýlar júzege asyp keledi», dedi Orman jáne ań sharýashylyǵy komıteti tóraǵasynyń orynbasary Qaıyrbek Musabaev.
Onyń aıtýyna qaraǵanda, Qazaqstandaǵy kıikter sanynyń quldyraý shegine jetken kezeń 2000 jyldar bolsa, 2001 jyly alǵash ret bul janýarlardy qorǵaý jáne esebin júrgizý úshin bıýdjetten 14 mln. teńge bólingen. Odan keıingi jyldary osy baǵyttaǵy bıýdjettik qarjylandyrý jyl saıyn arta túsken. Máselen, 2007-2009 jyldary arasynda ár jyly osy maqsatqa 200 mln. teńge jumsalyp keldi.
