Sońǵy úsh jylda elimizde vetpreparattardyń jartysy ımporttalǵan

NUR-SULTAN. QazAqparat – «Veterınarııa týraly» Zań qabyldanǵan kezden bastap búgingi kúnge deıin veterınarııa júıesi jyldan-jylǵa ózgeristerge ushyraýda. Bul týraly Senattaǵy parlamenttik tyńdaýda depýtat Muhtar Jumaǵazıev aıtty, dep habarlaıdy QazAqparat tilshisi.

«Memleket basshysy veterınarııa júıesin reformalaý jóninde naqty sharalar qabyldaýdy tapsyrǵan. Bul salada qordalanǵan máseleler az emes. Mysaly, 2002 jyly «Veterınarııa týraly» Zań qabyldanǵan kezden bastap búgingi kúnge deıin veterınarııa júıesi jyldan-jylǵa ózgeristerge ushyraýda. Alaıda, aıtarlyqtaı ózgerister baıqalady dep aıtý qıyn. Onyń ústine, qazirgi zamanaýı ǵylymı jáne tehnologııalyq jetistikterden artta qalýy sebebinen kúrdelene tústi. Sondyqtan, veterınarııa salasynda úderisterdi tsıfrlandyrý, málimetti jınaý ári ony avtomattandyrý, kadrlardy daıarlaý jáne olardyń jalaqysyn arttyrý ózekti máselelerdiń biri», - dedi M. Jumaǵazıev «Aýyl sharýashylyǵyn damytýdyń ózekti máseleleri men perspektıvalary» taqyrybyna arnalǵan parlamenttik tyńdaýda.

Osy oraıda ol veterınarııalyq qaýipsizdigne toqtala kele, aýyl sharýashylyǵy janýarlaryn emdeý, boljaý jáne aldyn alý ádistemelerin jetildirý kerek ekenin aıtty.

Senatordyń paıymynsha, aýyl sharýashylyǵy janýarlaryn dıagnostıkalaý ári emdeýge arnalǵan veterınarııalyq preparattardyń sapasy men qoljetimdiligin uıymdastyrý jáne otandyq preparattar úlesin arttyrýdy qarastyrý mańyzdy.

«Máselen, sońǵy úsh jylda 21,7 mlrd teńgege vetpreparattar satyp alynǵan, sonyń ishinde 49% otandyq ónim bolsa, qalǵany ımporttalǵan. Sondyqtan otandyq vetpreparattardyń sapasy men qoljetimdiligin arttyrý úshin Aýyl sharýashylyǵy mınıstrligi men otandyq taýar óndirýshiler arasynda uzaq merzimdi kelisimsharttar jasasý jáne birinshi kezekte satyp alýdy tek otandyq óndirýshiler arasynda ótkizý kerek. Asa qaýipti aýrýlar boıynsha bir kózden alý tásilimen memlekettik satyp alýdy júzege asyrý qajet», - dedi Muhtar Jumaǵazıev.