Sońǵy úsh jylda elimizde sýıtsıd 14 paıyzǵa azaıdy
ASTANA. 14 mamyr. QazAqparat - Sońǵy úsh jylda Qazaqstandaǵy sýıtsıd kórsetkishi 14 paıyzǵa deıin tómendep otyr. Bul týraly búgin Astanada «Sýıtsıdterdiń aldyn-alýdyń memlekettik deńgeıdegi vedomstvoaralyq aspektileri» taqyrybynda ótken halyqaralyq konferentsııa barysynda málim boldy.
QR Densaýlyq saqtaý mınıstrligine qarasty Respýblıkalyq psıhıatrııa, psıhoterapııa jáne narkologııa ǵylymı-tájirıbelik ortalyǵynyń dırektory Saǵat Altynbekovtiń aıtýynsha, osydan úsh jyl buryn Qazaqstan TMD elderi arasynda sýıtsıd deńgeıinde úshinshi orynda turǵan bolatyn.
«Qazirgi tańda onyń deńgeıi 14 paıyzǵa deıin tómendedi. Bul kórsetkishke qol jetkizýde eń aldymen sýıtsıdtiń aldyn-alý baǵdarlamasy men vedomstvoaralyq jospary ázirlengen bolatyn. Al osy baǵyttaǵy jumystar barysynda halyqaralyq tájirıbe eskerildi», - dedi ortalyq basshysy. Onyń aıtýynsha, búgingi tańda Qazaqstan boıynsha mektep pen emhana psıhologtary, áleýmettik qyzmetshiler, synyp jetekshilerin sýıtsıdologııa máseleleri boıynsha oqytý qolǵa alynǵan. Budan bólek, aldaǵy oqý jylynan bastap joǵary oqý ornynyń 5-6 kýrs stýdentteri úshin psıhoterapııa, psıhologııa boıynsha arnaıy oqý saǵattary qarastyrylady.
