Sońǵy úsh jylda Aqmola oblysyna 2 myńǵa jýyq jas pedagog keldi
Aqmola oblystyq bilim basqarmasy baspasóz qyzmetiniń málimetinshe, óńirde barlyq deńgeıdegi bilim berý uıymdarynda pedagogıkalyq qyzmetti 23 myńnan astam pedagog qyzmetker júzege asyrady, onyń ishinde oblystyń jalpy bilim beretin mektepterinde 16 myńnan astam pedagog jumys isteıdi.
«Bizde kadrlarǵa qajettilik oqý jylynyń sońynda aıqyndalady, óıtkeni «Bilim týraly» Qazaqstan Respýblıkasy Zańynyń 6-babynyń 20-1-tarmaǵyna sáıkes aýyldyq jerdegi kadrlarǵa qajettilik týraly málimetterdi (aýdan boıynsha, oqý júktemesi, turǵyn úımen qamtamasyz etilý) jyl saıyn 15 sáýirge deıin bilim bólimderi bilim basqarmasyna qandaı mektepke maman qajet ekenin usynady. Búgingi tańda oblysta mamandardyń jetispeýshiligi joq, óıtkeni kadrlarǵa degen qajettilik jas mamandardyń kelýi esebinen, sondaı - aq joǵary kásibı jáne biliktilik deńgeıi bar zeınetkerlik jastaǵy pedagogtardy tartý esebinen jabylady», - dep atap ótti vedomstvodan.
Jyl saıyn oblystyń bilim berý uıymdaryna jumys isteý úshin 900-den astam maman, onyń ishinde 400-den astam jas mamandar keledi.
Sońǵy úsh jylda óńirge 1795 jas maman keldi.
Aýyldyq jerlerdegi bilim berý uıymdaryna jas mamandardy tartýǵa «Dıplommen aýylǵa» baǵdarlamasyn iske asyrý yqpal etedi.
«Bizdiń elimizde «Dıplommen aýylǵa» baǵdarlamasy 2009 jyldan bastap júzege asyrylýda. Erejege sáıkes, aýyldyq jerlerge jumysqa kelgen pedagogtar turǵyn úı satyp alýǵa nemese salý úshin 15 jyl merzimge jyldyq 0,01 paıyzben (3,8 mln teńge) 100 AEK jáne 1500 AEK mólsherinde qarajat alady», - dep tolyqtyrdy vedomstvodan.
Aqmola oblystyq ekonomıka jáne bıýdjettik josparlaý basqarmasynyń dereginshe, 2021 jylǵy 30 jeltoqsandaǵy jaǵdaı boıynsha bilim salasyna jumysqa kelgen 476 maman 138 mıllıon teńge kóterme járdemaqy aldy.
244 mamanǵa turǵyn úı satyp alýǵa 1 mıllıard 47 mıllıon 623 myń teńge somasynda nesıe bólindi.
Sondaı-aq bilikti pedagog kadrlardyń tapshylyǵy problemasyn sheshý, onyń ishinde muǵalimderdi aýyldyq jerlerde bekitý úshin joǵary pedagogıkalyq bilim alýǵa jergilikti bıýdjet qarajaty esebinen memlekettik bilim berý granttaryn bólý tájirıbesi jalǵasýda.
Qazirgi ýaqytta oblys ákiminiń granty boıynsha 400 adam oqıdy, olar oqý ornyn bitirgennen keıin oblys mektepterine jumysqa jiberiledi.
2021 jyly grantty 92 stýdent aldy, onyń ishinde 52 maman oblystyń bilim berý uıymdaryna jiberildi, 34-i magıstratýraǵa tústi.
«Kadrlar – bilim berý júıesiniń negizgi jáne asa mańyzdy resýrsy ekenin eskere otyryp, pedagogıkalyq kadrlarmen qamtamasyz etý máselesi turaqty baqylaýda», - dep túıindedi vedomstvodan.
