Sońǵy úsh jylda 3 myńnan astam úleskerdiń máselesin sheshý úshin 1 mln. sharshy metr turǵyn úı salyndy

ASTANA. QazAqparat - Sońǵy úsh jylda 3 myńnan astam úleskerdiń máselesin sheshý úshin 1 mln. sharshy metr turǵyn úı salyndy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Samuryq-Qazyna» Jyljymaıtyn múlik qory» AQ Basqarma Tóraǵasy Bolat Palymbetov málimdedi.

Basqarma tóraǵasynyń aıtýynsha, «Samuryq-Qazyna» Jyljymaıtyn múlik qory» - «Qoljetimdi baspana-2020» memlekettik baǵdarlamasyn júzege asyratyn operatorlardyń biri bolyp tabylady.

«Negizi, Jyljymaıtyn múlik qory 2009 jyly qurylǵan bolatyn, sol kezdegi maqsatymyz úleskerlerdiń máselelerin sheshý, toqtap qalǵan qurylystardy aıaqtaý boldy. Sol baǵdarlama boıynsha úsh myńnan astam úleskerdiń máselesi sheshilip, 1 mln. sharshy metrge jýyq turǵyn úı salyndy. Al «Qoljetimdi baspana-2020» baǵdarlamasy aıasynda 15 joba boıynsha turǵyn úı salýdy qolǵa aldyq. Nátıjesinde, búgin Aqtóbe, Taraz qalalarynda jáne Almaty oblysynda jalpy aýmaǵy 150 myń sharshy metrden astam turǵyn úıler paıdalanýǵa berildi», - dedi B. Palymbetov.