Sońǵy úsh jylda 2323 sheteldik qazaq jastary elimizde arnaıy grantpen joǵary oqý oryndaryna qabyldandy
ASTANA. QazAqparat - Sońǵy úsh jylda 2323 sheteldik qazaq jastary elimizde arnaıy grantpen joǵary oqý oryndarynda bilim alýǵa qabyldandy. Búgin Májiliste kóshi-qon úderisterine arnalǵan dóńgelek ústel barysynda Bilim jáne ǵylym vıtse-mınıstri Tahır Balyqbaev osylaı aıtty.
«Elimiz Táýelsizdik alǵan kezden bastap, sheteldegi qandastarymyzdyń qamy únemi Úkimet nazarynda bolǵany, jalpy kóshi-qon máselesi memlekettik saıasattyń deńgeıine kóterilgeni barshaǵa aıan. Ulttyq múdde jáne keleshek urpaq úshin táýelsiz elimizdiń tórt qubylasyn túgendeý turǵysynda jasalyp jatqan osy ıgi sharaǵa bilim salasy da atsalysyp kele jatyr», - deıdi vıtse-mınıstr.
Onyń aıtýynsha, joǵary bilim berý salasyndaǵy memlekettik bilim berý granttarynyń 2 paıyzy arnaıy kvota retinde qazaq dıasporasynyń ókilderine bólinip otyr. Osy 2 paıyzdyq kvota boıynsha sońǵy úsh jylda 2 myń 323 qazaq jastary bilim grantynyń negizinde oqýǵa qabyldanǵan. Oqýǵa qabyldanǵandardyń basym kópshiligi Ózbekstan, Qytaı, Mońǵolııa elderine tıesili.
«Memlekettik bilim berý tapsyrysynyń negizinde oqıtyn qazaq dıasporasynyń ókilderi tegin jataqhanamen, shákirtaqymen, jylyna eki ret beriletin jol júrý aqysymen qamtamasyz etiledi», - deıdi T. Balyqbaev.
Vıtse-mınıstrdiń sózine qaraǵanda, sheteldegi qazaq jastary úshin joǵary oqý oryndary janynan daıyndyq kýrstary da ashylyp jatyr. Al mundaı kýrstar negizinen ál-Farabı, Ońtústik Qazaqstan ýnıversıtetterinde bolyp kelse, bıyldan bastap Soltústik jáne Shyǵys Qazaqstan oblystaryndaǵy oqý oryndaryna da bóline bastady.
«Bul negizinen eńbek resýrstary onsyz da artyq óńirlerden bólek, qaıta osyndaı resýrstary tapshy óńirlerge mamandar tartýǵa qatysty bolyp tabylady», - ded T. Balyqbaev.
