Sońǵy úsh jylda 1,5 mln shetel azamatyna eńbek etý quqyǵy berilgen
NUR-SULTAN. QazAqparat - Búginde shetel azamattaryna eńbek etý quqyǵyn beretin ruqsatnamany alýdy jeńildetý maqsatynda kóshi-qon ortalyqtary «Bir tereze» qaǵıdasymen jumys isteıdi, dep habarlaıdy QazAqparat QR Іshki ister mınıstrliginiń baspasóz qyzmetine silteme jasap.
«Elimizdiń áleýmettik-ekonomıkalyq turaqtylyǵy shetel azamattaryyń kóptep kelýine qolaıly jaǵdaı qalyptastyryp otyr. Tek sońǵy úsh jyldyń ishinde ishki ister organdary sheteldik eńbek mıgranttaryna Qazaqstanda eńbek etýge 1,5 mıllıon ruqsatnama berip, ony uzartqan. Eńbek mıgranttarynyń sany ásirese, kóktem-jaz kezinde óse túsedi», - delingen mınıstrliktiń habarlamasynda.
Habarlamada aıtylǵandaı, kórsetiletin qyzmetterdiń sapasyn arttyryp, onyń merzimin qysqartý, jemqorlyq táýekelderin joıý jáne qolaıly jaǵdaı jasaý úshin qurylǵan Kóshi-qon qyzmeti ortalyqtarynyń qyzmeti búginde «bir tereze» qaǵıdasymen usynylady.
«Kóshi-qon qyzmeti ortalyǵynda sheteldik tólqujat pen kóshi-qon kartochkasyn usyný arqyly medıtsınalyq tekserýden, daktılaskopııadan ótedi, saqtandyrýdy rásimdep, memlekettik baj salyǵyn tóleıdi, sodan soń oǵan jumys jasaýǵa ruqsatnama rásimdeledi. «Azamattarǵa arnalǵan úkimet» birige otyryp, elimizdiń 14 óńirinde Kóshi-qon ortalyqtary ashyldy», - deıdi ІІM Kóshi-qon qyzmeti komıtetiniń tóraǵasy Marat Qabdenov.
Mınıstrliktiń málimetine súıensek, ótken jyly turǵyndarǵa 19,5 mln memlekettik qyzmet kórsetilse, sonyń 16,5 mıllıony - kóshi-qon máselesi boıynsha. Al bıylǵy jylǵy úsh aıynyń qorytyndysy boıynsha azamattarǵa kóshi-qon máselesine baılanysty 2 mln 777 myń memlekettik qyzmet kórsetildi.
