Sońǵy úsh aptada elordada karantın talaby jıi buzylǵan

NUR-SULTAN. QazAqparat – Bıylǵy 18 qyrkúıekten 12 qazanǵa deıin 5 224 nysanda karantın talaby buzyldy. Bul týraly QR Densaýlyq saqtaý vıtse-mınıstri – QR Bas memlekettik sanıtar dárigeri Erlan Qııasov málim etti, dep habarlaıdy QazAqparat tilshisi.

«Mobıldi monıtorıng toby karantın sharalarynyń saqtalýyn reıdtik tekserý arqyly jalǵastyrýda. Karantın rejımi jeńildegen sátten bastap, ıaǵnı 18 qyrkúıekten 12 qazanǵa deıin 26 759 nysan tekserilip, 5 224 nysanda talap buzylǵany anyqtaldy», - dedi E. Qııasov Ortalyq kommýnıkatsııalar qyzmetinde.

Onyń sózine qaraǵanda, sońǵy úsh aptada Nur-Sultan qalasynda ereje jıi buzylǵan, tekserilgen obektilerdiń 62 paıyzy sanıtarlyq-epıdemııaǵa jáne sanıtarlyq -profılaktıkalyq sharalar men karantın rejımi talaptaryn saqtamaı jumys istegen. Almaty qalasynda baqylaýmen qamtylǵan nysandardyń 52 paıyzynda ereje buzý jaǵdaıy anyqtaldy. Soltústik Qazaqstan men Almaty oblystarynda bul kórsetkish sáıkesinshe 40 jáne 39 paıyzdy qurady.