Sońǵy úsh aptada 12 bala terezeden qulap ketken
NUR-SULTAN. QazAqparat - Jyl basynan beri kópqabatty úıdiń terezesinen 26 bala qulap ketken. Onyń ishinde 12 oqıǵa mamyr aıyndaǵy 20 kún ishinde bolǵan, dep habarlaıdy QazAqparat Іshki ister mınıstrlgine silteme jasap.
Terezeden abaısyzda qulap ketetin balalardyń kóbi - 2 men 8 jas aralyǵyndaǵylar.
Kóktem-jaz kezeńi bastalyp, turǵyndar páterdi jıi jeldete bastady. Karantın jaǵdaıynda balalar kóp ýaqytyn úıde ótkizedi. Al ata-analar men týystary úıden jıi shyǵyp ketedi nemese balalardyń ár nársege qumarlyǵyn esten shyǵaryp, úı jumysymen alańsyz aınalysady.
Balalar ashyq terezeniń qanshalyqty qaýipti ekenin bilmeı, jaqyn baryp oınaıdy. Qazirgi terezeler balalardyń ózderi ashyp alýyna óte yńǵaıly.
ІІM azamattardy qaýipsizdik erejelerin saqtaýǵa shaqyrady:
- Úıde kishkentaı bala bolsa, terezeni ashyq qaldyrmańyz.
- Terezeniń qorǵanyshy bolmasa moskıt toryn paıdalanbańyz.
- Balany, ásirese, tereze men shyny esikterdiń janynda qaraýsyz qaldyrmańyz.
- Bala tereze aldyna shyqpas úshin terezeniń janyna jıhaz qoımańyz.
- Balalardyń tereze janyndaǵy jıhazǵa nemese tósekke sekirip oınaýyna jol bermeńiz.
- Balalarǵa qaýipsizdik sabaqtaryn úıretý mańyzdy. Eresek balalarǵa kishilerge qaraýdy úıretý kerek.
- Balalar bólmesiniń terezesine kerek-jaraqty muqııat tańdańyz. Atap aıtqanda, kúnnen qorǵaý quraldary – jalıýzder men rýlondy perdeler jarqyraıtyn baýlar men tizbektersiz bolýy tıis.
«Balalardyń úıdegi qaýipsizdigine birinshi kezekte ata- ana jaýapty» dep eskertedi Іshki ister mınıstrligi.
