Sońǵy ýaqytta elimizde ajyrasý kezinde balany ákesimen qaldyrý máselesi kóterilýde - Ulttyq komıssııanyń otyrysy
ASTANA. Sáýirdiń 16-sy. QazAqparat /Rýslan Ǵabbasov/ - QR Joǵarǵy sotynyń málimeti boıynsha, 2009 jyly 52 myńǵa jýyq ajyrasý faktileri boldy. Bul týraly búgin Astanada QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń otyrysy barysynda Eńbek jáne hylyqty áleýmettik qorǵaý mınıstri Gúlshara Ábdihalyqova málim etti,
dep habarlaıdy QazAqparat.
«Byltyrdyń ózinde 52 myńǵa jýyq ajyrasý faktileri bolǵan. Onyń ishinde eń qıyn máselelerdiń biri retinde ata-anasy ajyrasý kezinde balanyń kimmen qalýy daýly sanalady. Menińshe, árbir jeke jaǵdaıda jekeshe qaralýy kerek dep oılaımyn. Bir jaǵdaıda bala ákesimen, al keıbirde, ıaǵnı kóp jaǵdaıda anasymen bolýy tıis»,-dedi mınıstr.
G. Ábdihalyqovanyń aıtýynsha, 2008 jyly ajyrasý sany 49 myńdy quraǵan. Ókinishke qaraı bir jyldyń ishinde birshama ósim paıda boldy.
«Kámeletke tolmaǵan balanyń turǵylyqty jerin anyqtaý máselesine toqtalsaq, 5 jyl buryn talap retinde kámelet jasyna tolmaǵan jetkinshekter anasymen qalatyn. Al kerisinshe qazirgi kezde Atyraý oblysynda basqa úrdis paıda bolýda, ıaǵnı áıelder jaǵy bala ákesimen qalsyn degen máseleni kóterýde. Atap aıtqanda, osyndaı máseleler bar, kóbinese Astana men Almaty qalalaryndaǵy jetkinshekterdiń ákeleri bundaı bastamalardy kóterip júr»,-dedi otyrys kezinde QR Joǵarǵy sotynyń Azamattyq ister jónindegi sot alqasynyń tóraǵasy Almaz Tashenova.
A. Tashenovanyń sózine qaraǵanda, osyndaı ister Joǵarǵy sotqa deıin jetip jatady. «Bundaı faktiler boıynsha ákeleri belsendi túrde balalaryn tárbıleýge quqyly ekenin dáleldeýge tyrysyp jatady»,-dedi ol.
Bul turǵydaǵy ister óte kúrdeli ekenin jáne osy máseleler boıynsha eń aldymen balalardyń múddesin qorǵaý mańyzdy sanalatynyn jetkizgen A. Tashenova, keıbir kezderde ata-analary bir-birimen esep aıyrysyp jatatynyn, al nátıjesinde bul daýdyń saldary balaǵa aýyr túsetinin aıtyp ótti.
