Sońǵy táýlikte Qazaqstanda JSN rásimdegen reseılikter sany kúrt artty

ASTANA. QazAqparat – Sońǵy bir táýlikte Qazaqstanda reseılikterdiń jeke sáıkestendirý nómirin rásimdeý kórsetekishi kúrt artqan. Bul týraly QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Áset Turysov aıtty, dep habarlaıdy QazAqparat tilshisi.

«Qazirgi kezde elimizde rezıdent emes adamdarǵa JSN berý eńbek sharttaryn bekitý, kórsetilgen qyzmetter úshin qarajat alýǵa, ákimshilik jazaǵa tartýǵa, salyq eseptiligin júrgizýge, sondaı-aq túrli bank operatsııalaryn júrgizý úshin kerek. Qazaqstan Respýblıkasynda ýaqytsha bolatyn sheteldikter men azamattyǵy joq adamdarǵa JSN berý qyzmeti «Azamattarǵa arnalǵan úkimet» memlekettik korporatsııasy arqyly kórsetiletinin atap ótkim keledi. JSN 1 jumys kúni ishinde daıyndalady. Beırezıdenttiń qolynda pasport bolýy qajet, onyń ókili júgingen jaǵdaıda notarıaldy kýálandyrylǵan senimhat qajet», - dedi Áset Turysov Ortalyq kommýnıkatsııalar qyzmetinde.

Osy oraı ol sońǵy kúnderi Qazaqstanǵa kelip jatqan Reseı azamattarynyń sany artqanyn eske saldy. RF azamattary beırezıdentke arnalǵan JSN alý úshin jappaı HQKO-ǵa baryp jatyr. Sonyń saldarynan HQKO-larǵa júktemeniń artqany baıqalyp otyr.

«Qazirgi ýaqytta JSN alý úshin kelgen reseılikterdiń basym bóligi Astana men Almatyda jáne shekaralas qalalarda kóp baıqalǵan. Keshe ǵana elimiz boıynsha 13 myńnan astam ótinim qabyldandy. Osyǵan deıin shamamen mundaı kórsetkishtegi ótinimdi bir aı boıy qabyldaıtynbyz», - dedi vıtse-mınıstr.