Sońǵy «Soıýz - FG» zymyrany Gagarın ushý alańyna turǵyzyldy

BAIQOŃYR. QazAqparat – «Soıýz-FG» tasymaldaýshy zymyrany Gagarın atyndaǵy №1 start alańyna turǵyzyldy. Ol «Soıýz MS-15» basqarylatyn kemesin alyp ushady, dep habarlaıdy QazAqparat.

Roskosmos baspasóz qyzmetiniń málimdeýinshe, alǵashqy start kúniniń baǵdarlamasy aıasyndaǵy jumystar bastaldy, mamandar sońǵy tehologııalyq operatsııalardy júrgizip jatyr. «Soıýz-FG» tasymaldaýshy zymyranynyń júıeleri men agregattaryn ushar aldynda tekserip alý synaqtary bastaldy.

Zymyrandy start alańyna shyǵarý protsedýrasyn kórý úshin «Roskosmos» basshylyǵy, ǵaryshkerlerdiń otbasy músheleri, ǵarysh agenttikteri men ǵarysh-zymyran salasyndaǵy kásiporyndardyń ókilderi, jýrnalıster, týrıster keldi.

Aldaǵy start «Soıýz-FG» zymyrandarynyń sońǵy – jetpisinshi ushýy bolmaq. Budan tys, zymyran Halyqaralyq ǵarysh stantsııasyna Birikken Arab Ámirlikteriniń tuńǵysh ǵaryshkerin aparady. Sodan keıin «Gagarın starty» jańǵyrtý úshin jabylady.

Jospar boıynsha, «Soıýz-FG» 2019 jylǵy 25 qyrkúıek kúni Nur-Sultan ýaqytymen 19 saǵat 57 mınýt 43 sekýndta ushady.

Eske salaıyq, negizgi ekıpaj: reseılik ǵaryshker Oleg Skrıpochka, amerıkalyq Djessıka Meır jáne BAÁ ókili Hazzaa ál-Mansýrıden turady. Olardyń dýblerlary - Sergeı Ryjıkov, Tomas Marshbern jáne Sultan ál-Neıadı.

Avtory Sara Qabıqyzy