«Sońǵy sátti seziný» romany úshin brıtandyq Djýlıan Barns Býker júldesine ıe boldy
ASTANA. 19 qazan. QazAqparat - Tanymal 2011 jylǵy Býker júldesi «Sońǵy sátti seziný» («The Sense of an Ending») romany úshin brıtandyq jazýshy Djýlıan Barnsqa buıyrdy.
ITAR-TASS-tyń habarlaýynsha, ádebıettegi postmodernızm ókili Barns buǵan deıin de birneshe romandarymen, atap aıtqanda: 1984 jyly «Flober totyqusy» ("Flaubert's Parrot"), 1998 jyly «Anglııa, Anglııa» jáne 2005 jyly «Artýr ı Djordj» romandarymen jeńiske jetýge sál-aq qalyp, júldeniń «short-paraqshasyna» ilikken bolatyn.
«Sońǵy sátti seziný» romanyn onyń 150 bettik kólemi úshin synshylar «novella» dep te ataıdy. Kitap bir qaraǵanda qarapaıym bop kórinetin Tonı esimdi keıipkerdiń ómiri jaıly. Romanda ol eske túsirgen jaıttary ózi oılaǵandaı shynaıy emes ekendigine kóz jetkizedi.
Jazýshynyń jeńisine kóptegen tanymal býkmekerlik keńseler bás tikken bolatyn. Alaıda, qazylar alqasynyń múshesi ári MI-5 brıtandyq barlaý qyzmetiniń burynǵy basshysy Stella Rımıngtonnyń sózine qaraǵanda, mundaı sheshim qabyldaý qazylar alqasyna ońaı tıgen joq, tipti, sońǵy sátte Barns týraly pikir qaq aıyrylyp ketken kezder de bolǵan.
Júldeniń mólsheri - 50 myń fýnt sterlıng (80 myń dollar). «Short paraqshaǵa» ilikkender de qur alaqan qalǵan joq, olardyń árqaısysyna 2,5 myń fýnt kóleminde syıaqy tabystaldy.
