Sońǵy on jylda Saýd Arabııasynan Qazaqstanǵa ınvestıtsııa 94 mln. dollardy quraǵan - Qarjy mınıstri
ASTANA. QazAqparat - Sońǵy on jylda Saýd Arabııasynan Qazaqstanǵa ınvestıtsııa 94 mln. dollardy quraǵan. Bul týraly búgin Parlament Májilisiniń jalpy otyrysynda QR Qarjy mınıstri Baqyt Sultanov málim etti.
Eske salaıyq, jalpy otyrysta «QR Úkimeti men Saýd Arabııasy Koroldiginiń Úkimeti arasyndaǵy tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýǵa jol bermeý týraly konventsııany jáne oǵan Hattamany ratıfıkatsııalaý týraly» zań jobasy maquldandy. Hattamaǵa 2011 jyldyń 7 maýsymynda qol qoıylǵan.
«Statıstıkalyq derekterge súıensek, Qazaqstan men Saýd Arabııasy arasyndaǵy taýar aınalymy sońǵy on jylda 268 mln. dollardy quraǵan. Al 2015 jyly bul 16 mln dollardy qurady. Qara metalldan jasalǵan buıymdar, tazartylǵan mys jáne temir qospalary elimizdiń eksportynyń negizgi baǵyttary bolyp tabylady. Al ımport qurylymynda dárilik zattar men basqa da buıymdar basymdyqqa ıe», - dedi Qarjy mınıstri Baqyt Sultanov.
Onyń aıtýynsha, Saýd Arabııasynan sońǵy on jylda Qazaqstanǵa ınvestıtsııa 94 mln. AQSh dollardy quraǵan. Onyń ishinde byltyrǵy jyly 8 mln. AQSh dollaryn quraǵan.
«Eki el arasyndaǵy ınvestıtsııalyq jáne ekonomıkalyq áleýetti arttyrý úshin búgingideı kelisimsharttar kerek. Statıstka kórsetkendeı, biz osyndaı kelisim jasalǵannan keıin memleketterde sońǵy on jylda ınvestıtsııa 169 mlrd dollardy qurady, bul - barlyq ınvestıtsııanyń 84 paıyzy. Jalpy Qazaqstan osyndaı qosarlanǵan salyqty boldyrmaý týraly 49 memleketpen kelisimshartqa qol qoıylǵan. Qazirgi kúni qosymsha alty memleketpen kelissózder júrgizip, taǵy alty elmen ózgerister jasaý týraly kelistik», - dedi mınıstr.
Qarjy mınıstriniń sózine qaraǵanda, Qazaqstan tarapynan ınvestıtsııalyq joba retinde Saýd Arabııasyna munaı óńdeý salasyndaǵy ınfraqurylymdarǵa qatysty birqatar birlesken jobalar, qurylys ındýstrııasy men farmatsevtıka baǵytynda jobalar usynylǵan. Qazirgi kúni saýdııalyq kásipkerler tarapynan Qazaqstan aýmaǵynda farmatsevtıkalyq salaǵa qatysty jobaǵa qyzyǵýshylyq bildirilgen.
Aıta keterligi, Konventsııa eki el arasyndaǵy ekonomıkalyq yntymaqtastyq pen ınvestıtsııalyq aǵymdar úshin qolaıly jaǵdaılar jasaıtyn bolady.
