Sońǵy on jylda respýblıkada qan aınalymy júıesiniń aýrýlarynan qaıtys bolǵandar 18,4 paıyzǵa kemidi - Densaýlyq saqtaý mınıstri
TANA. 24 tamyz. QazAqparat /Aıdar Ospanalıev/ - Sońǵy on jylda respýblıkada qan aınalymy júıesiniń aýrýlarynan qaıtys bolý - 18,4 paıyzǵa, jańa paıda bolǵan aýrýlardan qaıtys bolý -15 paıyzǵa jýyq, qaıǵyly oqıǵalardyń saldarynan ólgender - 25,6 paıyzǵa jáne tynys alý joldarynyń aýrýlarynan kóz jumǵandar 33,5 paıyzǵa kemip otyr.
Búgin Premer-Mınıstrdiń orynbasary Erbol Orynbaevtyń tóraǵalyq etýimen ótken Densaýlyq saqtaý jónindegi úılestirý keńesiniń XV májilisinde Densaýlyq saqtaý mınıstri Salıdat Qaıyrbekova osyndaı málimetter keltirdi.
Mınıstrdiń derekterinshe, atalǵan aýrý túrlerine baılanysty jaǵdaıdyń ońalýyna 2010 jyly aıaqtalǵan densaýlyq saqtaý salasyn reformalaý men ony damytý jónindegi memlekettik baǵdarlama tikeleı áser etti. «Al qazirgi «Salamatty Qazaqstan» baǵdarlamasynyń maqsaty - osy kórsetkishterdi álemdik standarttarǵa jetkizý. Bul baǵyttaǵy jumystar atqarý bılik deńgeıleriniń barlyǵynyń jáne densaýlyq saqtaý salasymen baılanysty ózge de qurylymdardyń tyńǵylyqty jáne tikeleı baılanysta jumys isteýin qajet etetin shara», - dedi S.Qaıyrbekova.
Onyń aıtýynsha, juqpaly emes aýrýlardyń ishinde qan aınalymy júıesiniń aýrýlary respýblıkada birinshi orynda tur. Bul aýrýdan mert bolǵandardyń 40 paıyzy eńbekke jaramdy azamattar. Osy 40 paıyzdyń jartysynan kóbi - er azamattar. Qan aınalymy júıesi aýrýlarynan kóz jumǵandar sany elimizdiń soltústik óńirlerinde kóptep oryn alýda. «Onkologııalyq aýrýlardyń arasynda aldyńǵy orynda Shyǵys Qazaqstan oblysy tur», - dedi mınıstr.
