Sońǵy olımpıadamdy sátti ótkizgim keldi: Olga Rypakova jankúıerlerine alǵys aıtty
«Barlyq jankúıerlerge, qazaqstandyqtarǵa qoldaý kórsetkenderińiz úshin, áleýmettik jelide jazǵan jyly sózderińiz úshin, qońyraý shalǵandaryńyz úshin rahmet aıtqym keledi. Jan tebirentetin tilekter men qoldaý boldy. Osy tórt Olımpıada boıy árqashan menimen birge boldyńyzdar, qoldadyńyzdar. Men úshin bul óte mańyzdy», - dedi Olımpıada chempıony Ortalyq kommýnıkatsııalar qyzmetinde.
Sportshynyń aıtýynsha, kóńil-kúıi men jalpy jaǵdaıy jaqsy bolǵan.
«Men burynǵydaı tolyq oıyn kórsetýge daıyn boldym. Ne nárse durys shyqpaǵanyn bilmeımin. Ózim de tolyq túsinbedim. Jańa ǵana stadıonnan keldim, áli jattyqtyrýshymen áńgimelesip, taldaý jasamadyq. Árıne, ózimniń sońǵy olımpıadamdy sátti ótkizgim keldi, jankúıerlerimdi taǵy da qýantqym keldi. Jeńis tuǵyryna shyǵyp, qýanysh sezimin syılaǵym keldi. Biraq bul árdaıym bola bermeıdi. Aýa raıy keremet, jaǵdaıymyz da jaqsy, biraq bir nárse bolmaı qaldy. Qatelikterdi qaraımyz jáne talqyǵa salamyz», - dedi jeńil atlet.
Olga Rypakova aldyńǵy jáne osy Olımpıadalar arasynda aıyrmashylyq sezilgenin atap ótti.
«Munda kórermenderdiń joqtyǵyn aıtamyn. Jarys kezinde esh kórermen bolmady. Bul da seziledi eken. Jankúıerlerge jáne Olımpıadanyń uıymdastyrý komıtetine taǵy da rızashylyǵymdy bildirgim keledi, olar qıyn jaǵdaıda da Olımpıada oıyndaryn ótkizdi. Olar úlken alǵys pen qurmetke laıyq», - dedi Olga Rypakova.
Foto: Danııar Maılybaev, UOK