Sońǵy oqıǵalar bizde lańkestikke qarsy júıe jetilmegen degendi bildirmeıdi - Erlan Qarın
MATY. 16 qarasha. QazAqparat /Erlik Erjanuly/ - Tarazdaǵy sońǵy oqıǵalar bizde lańkestikke qarsy júıe jetilmegen nemese qalyptaspaǵan, quqyq qorǵaý organdarynyń áleýeti jáne resýrstary jetispeıdi degendi bildirmeıdi.
Saıasattanýshy Erlan Qarın búgin Almatyda ótip jatqan «Qazaqstannyń lańkestikke qarsy júıesi. Máseleler dıagnostıkasy jáne qoǵamdaǵy róli» dep atalatyn dóńgelek ústel jıynynda osylaı málim etti.
«Qazaqstan TMD elderiniń ishinen eń alǵashqylardyń biri bolyp 1999 jyl «Lańkestike qarsy kúres týraly» Zańdy qabyldady. Odan keıin 2 ret ózgerister engizdi, ıaǵnı lańkestikpen kúresti únemi jetildirip, tıisti sharalar qabyldady. 2003 jyl Prezıdenttiń jarlyǵymen Ulttyq qaýipsizdik komıtetiniń Daǵdarysqa qarsy ortalyǵy quryldy. Ol lańkestikke qarsy kúres baǵytyndaǵy 9 organ men mekemelerdiń jumysyn úılestirýge baǵyttalǵan bolatyn», - deıdi saıası ǵylymdardyń kandıdaty E. Qarın. Onyń aıtýynsha, keıin bul Ortalyqtyń janynan jedel jumys uıymdastyrý maqsatynda shtab quryldy. Sondaı-aq lańkestik shabýyldardan qorǵaný jumystaryn uıymdastyrý úshin ınfraqurylymdyq, kóliktik jáne taǵy basqa da baǵyttardaǵy 300-ge jýyq strategııalyq nysandardyń tizimi jasalǵan.
