Sońǵy kúnderi baspana saýdasy artty
ASTANA. QazAqparat - Sońǵy 3 kúnde baspana saýdasy artty. Bul týraly búgin Astanada ótken baspasóz máslıhatynda Qazaqstannyń Qurylys salýshylar qaýymdastyǵynyń atqarýshy dırektory Aslan Túkıev málim etti.
Sońǵy kúnderdegi oqıǵalar elimiz boıynsha baspana saýdasyna túzetýler engizgenine toqtalǵan ol, «teńge baǵamynyń ózgerýine qaramastan ótken 3-4 kúnde baspana saýdasy artty. Bul jaıynda men naqty aıta alamyn. Adamdar qoldarynda bar qarjyny tıimdi jumsaýǵa áreket jasaýda»,-dedi.
A. Túkıevtiń paıymynsha, buǵan keıbir qurylys salýshylar valıýta baǵamyn 180 teńge, al keıbireýleri 198 teńge deńgeıinde ustap turýy sebep bolýda.
«Sondyqtan da qazirgi kezde baspana alýǵa nıettenip júrgen adamdarǵa satyp alý múmkindigi bar jáne turǵyndar búginde dál solaı istep te jatyr. Árıne, baǵamnyń aǵymdaǵy deńgeıin, ıaǵnı bankterdegi sekildi bir dollarǵa 252 teńgeden ustap turǵan qurylysshylar da bar. Bularda satylym aıtarlyqtaı tómen»,-dedi ol.
Qaýymdastyq ókilderiniń aıtýynsha, uzaq merzimdi bolashaqta baǵanyń ósýine nemese quldyraýyna boljaý jasaý múmkin emes.
«Buny Úkimettiń qandaı ustanymda bolatyndyǵy aıqyndaıdy. ıAǵnı, osyǵan turǵyn úı naryǵyn damytý úshin, sondaı-aq naryqty nesıelendirý múmkindigin arttyrý úshin yntalandyrýshy, qoldaý kórsetýge negizdelgen baǵdarlamalardyń bolýy yqpal etedi»,-dedi A. Túkıev.
