Sońǵy kúnderde Qyzylorda oblysynda eki bala sýǵa ketip, bir adam elektr togynan qaıtys boldy
QYZYLORDA. 31 mamyr. QazAqparat /Jańagúl Serdaly/ - Sońǵy kúnderde Qyzylorda oblysynda eki bala sýǵa ketip, bir adam toqqa túsip, qaza tapty, dep habarlaıdy oblystyq tótenshe jaǵdaılar departamenti baspasóz qyzmetiniń bas mamany Aıgúl Nurmanova.
Oblystyń Shıeli aýdany Qarǵaly eldi mekeni tusynda Syrdarııa ózenine 1993 jyly týǵan jasóspirim ketip qalǵan. Oqıǵa bolǵan jerge Shıeli aýdandyq tótenshe jaǵdaılar bóliminen 2 adam, 1 tehnıka jáne Sýda qutqarý qyzmetinen 4 adam 1 tehnıka jetip, máıitti izdestirý jumystaryn jasaǵan. Darııanyń kelesi qurbany Qazaly aýdany Jalańtós bahadúr aýylynda oryn aldy. Osyndaǵy «Vodokachka» ýchaskesi mańynda 2006 jyly týǵan bala sýǵa ketken. Marqumnyń denesin 18 saǵat 10 mınýtta jergilikti turǵyndar sýdan shyǵarǵan.
Jalaǵash kenti T.Júrgenov kóshesinde «ASAR» JShS jumysshysy, 1992 jyly týǵan jas jigit elektr-montajdaý jumystary kezinde elektr togyna tartylyp, qaza bolǵan.
