«Sońǵy qońyraý» kezinde Almaty polıtsııasy balalarǵa jol erejesin qatań saqtaýdy eskertti

Bul týraly qalalyq ІІD baspasóz qyzmeti habarlady.

Ár mekteptiń «sońǵy qońyraý» saltanatyna qatysqan Jol-patrýldik ınspektorlary mektep muǵalimderi men ata-analarǵa jazǵy demalys kezinde balalardyń jol qozǵalysy erejesin saqtaýyn qadaǵalaýdy tapsyrdy.

«Jazǵy demalys kezinde balalardyń tártibi men qımyl-qozǵalysyn qadaǵalaý ata-analardyń mindeti. Jaz kezinde jolda oınaıtyn balalardyń sany kóbeıe túsedi. Sondyqtan, ata-analarǵa olardyń júris-turysyn qatań qadaǵalaýdy eskertip otyrmyz. Osy oraıda qalalyq Jol-patrýldik polıtsııa ınspektorlary mektep oqýshylarymen jıi kezdesý ótkizip, profılaktıkalyq sharalardy júzege asyrýda», - dedi qalalyq ІІD ákimshilik polıtsııa basqarmasy basshysynyń orynbasary Jandos Muratalıev.

Qalalyq ІІD baspasóz qyzmetiniń taratqan aqparatyna sáıkes, Almatyda qazirgi tańda 180 jalpy bilim beretin mektep bar. Atalǵan mektepterdiń bárine bir-birden jol-patrýldik polıtsııa ınspektory bekitilgen. Olar únemi oqýshylarmen, ustazdar qaýymymen kezdesý ótkizip, profılaktıkalyq sharalardy júzege asyryp otyrady.

Sondaı-aq, qazir mektepishilik sharalar kezinde balalar kóp shoǵyrlanǵan jerlerde arnaıy qosyndar uıymdastyrylyp, qosymsha avtopatrýldik qadaǵalaý qarastyrylǵan.

Atalǵan jumys jazǵy demalys kezinde de jalǵasatyn bolady.