Sońǵy kadrlyq aýys-túıister birqatar strategııalyq salanyń jańǵyrýymen baılanysty – sarapshy

ASTANA. QazAqparat - Sońǵy kúnderi Memleket basshysy memlekettik apparattyń eń joǵary deńgeıinde birqatar kadrlyq aýys-túıis jasaǵan bolatyn. QR Tuńǵysh Prezıdenti qory janyndaǵy Álemdik ekonomıka jáne saıasat ınstıtýtynyń jetekshi sarapshysy, saıasattanýshy Orazǵalı Selteev atalǵan taǵaıyndaýlarǵa qatysty pikir bildirdi, dep habarlaıdy QazAqparat.

«Sońǵy ýaqyttaǵy basty kadrlyq aýys-túıistiń biri Nurlan Ermekbaevtyń Prezıdent kómekshisi - Qaýipsizdik keńesiniń hatshysy laýazymyna taǵaıyndalýy boldy. Muny birshama joǵarylaý dep baǵalaýǵa bolady. Burynǵy ornyna qaıta oralý - bul birinshi eshelonnyń saıasattanýshylar men memlekettik menedjerleri tobyna oralý. Ásirese, Qaýipsizdik keńesi konstıtýtsııalyq mártebe alatyndyǵyn eskerer bolsaq, onda onyń memlekettik basqarý júıesindegi róli sapaly túrde ózgerip, tolyqtaı alǵanda atalǵan organnyń yqpal deńgeıi arta túsedi», - dedi O.Selteev.

Sarapshynyń paıymynsha, N.Ermekbaev Din isteri jáne azamattyq qoǵam mınıstri retinde óz mıssııasyn oryndady. Onyń  negizgi mindetine eldegi din salasyn retke keltirý kirse, basty jobasy 2020 jylǵa deıingi dinı saıasat tujyrymdamasyn ázirlep, dinı qyzmet máseleleri jónindegi zańnamaǵa ózgerister engizý boldy.  Atalǵan zań jobasy búginde Parlament qaraýynda jatyr.  Mınıstrliktiń qyzmet aıasyna dinnen bólek memlekettiń azamattyq qoǵam jáne jastar saıasatymen ózara baılanysy kirdi. Alaıda, Nurlan Ermekbaev óz jumysynda din salasyn retteýge barynsha basymdyq berdi.

Al sarapshy Ermekbaevtyń ornyn basqan Darhan Kəletaevqa qatysty, onyń aldaǵy mindeti jastar saıasaty men úkimettik emes sektordyń ózara is-qımylyna bas nazar aýdarý ekendigin atap ótedi.

«Dál osy salalar búgingi kúni ádisterdi kúsheıtý men qaıta qaraýdy talap etedi. Al ol úshin onyń tájirıbesi jetkilikti. Darhan Kəletaev uzaq ýaqyt boıy ıdeologııalyq blogpen tikeleı jumys istedi. Kezinde ol jastar saıasaty jónindegi ókiletti organǵa basshylyq jasap, bul salaǵa Prezıdent Ákimshiliginde jetekshilik etken edi», - dedi ol.

Sonymen qatar, ol Talǵat Donaqovtyń Joǵary Sot Keńesiniń tóraǵasy, al Álııa Raqyshevanyń QR Prezıdenti Ákimshiligi Basshysynyń orynbasary qyzmetine taǵaıyndalýyna qatysty oń pikirin bildirdi.