Sońǵy eki jylda turǵyn úı qurylysy salasyndaǵy ınvestıtsııa kólemi 40 paıyzǵa qysqardy - B. Sultanov
ASTANA. 9 qarasha. QazAqparat /Rýslan Ǵabbasov/ - Elimizdiń kópshilik azamattary úshin jekemenshikke turǵyn úı alý qol jetimdi emes. Bul týraly búgin Astanada ótken «Qazaqstandaǵy qol jetimdi turǵyn úı - qol jetimdi ıpoteka: qalpyna keltirý baǵyttary» taqyrybyndaǵy dóńgelek ústelde QR Prezıdentiniń kómekshisi Baqyt Sultanov aıtty.
«Sońǵy bes jylda 31 mln. sharshy metrden astam turǵyn úı salyndy. Ótken jyly qurylys sektorynyń Іshki jalpy ónimdegi úlesi 8 paıyzdan astam kórsetkishke jetti. Al daǵdarysqa deıingi kezeńde, ıaǵnı 2006-2007 jyldary nesıelik, sondaı-aq turǵyn úı salasyndaǵy suranys kezinde qurylys jáne qarjy sektorlarynyń ІJÓ-de úlesi 42 paıyzdy qurady»,-dedi ol.
B. Sultanovtyń sózine qaraǵanda, 2008 jyldan bastap turǵyn úı qurylysy salasynda ınvestıtsııa kóleminiń tómendeýi úrdisi baıqalýda. «Sońǵy eki jylda ınvestıtsııa kólemi 40 paıyzǵa qysqardy. Osynyń saldarynan paıdalanýǵa beriletin turǵyn úıdiń ósiminiń kólemi tómendedi. Al 2009 jyly biz bul baǵytta teris kórsetkishterdi de baıqadyq»,-dedi .
Osy oraıda Prezıdent kómekshisi daǵdarys saldaryn eńserý baǵytynda Úkimet halyqty úımen qamtamasyz etý boıynsha sharalardyń aýqymyn kúsheıtkenin, arendalyq úıler salynyp, úleskerlerdiń problemalaryn sheshý máseleleri eskerilgenin jetkizdi.
Qazirgi kezde halyqty turǵyn úımen qamtamasyz etýde ońtaıly sharalardy atqarý kerektigine toqtalǵan ol, «búginde Qazaqstanda bir adamǵa shaqqandaǵy turǵyn úı 18 sharshy metrdi quraıdy. Bul kórsetkish damyǵan elderge qaraǵanda 2-3 ese kem. Atap aıtqanda elimizdiń kópshilik azamattary úshin jekemenshikke turǵyn úı alý qol jetimdi emes»,-dedi.
