Sońǵy eki jylda Qazaqstan áskerinde sýıtsıd tirkelgen joq - A.Óserbaev
Bul týraly búgin Ortalyq kommýnıkatsııalar qyzmetinde QR QK Bas shtaby Uıymdastyrý-jumyldyrý jumystary departamenti bastyǵynyń orynbasary - jasaqtaý basqarmasynyń bastyǵy Amantaı Óserbaev málim etti.
«Áskerdegi sýıtsıd faktilerine toqtalar bolsaq, sońǵy eki jylda Qarýly Kúshter salasynda jedel qyzmettegi áskerı qyzmetshiler arasynda sýıtsıd tirkelmegenin aıtqym keledi. Muny resmı túrde rastaı alamyz. Buǵan sarbazdardyń birneshe kezeń boıy psıhologııalyq tekserýden ótetini jaqsy áser etti deýge bolady. Byltyr kúzden bastap áskerge shaqyrylǵan azamattar «Aq suńqar» baǵdarlamasy boıynsha kompıýter arqyly test tapsyrady», - dep túsindirdi A.Óserbaev.
Polkovnık sondaı-aq kazarmalarda áli de bolsa álimjettik bar degen pikirdi joqqa shyǵarǵysy keldi. «Bul másele Qarýly Kúshterdiń qurylymdary úshin asa ózekti másele emes. Sebebi, senimdi túrde kazarmalarda álimjettik joq dep aıta alamyn. Árıne, ásker bolǵan soń, jigitterdiń áńgimesi aıtylatyny ras qoı. Onyń ústine, qazir áskerı bólimderdiń barlyǵy beınebaqylaý kameralarymen jasaqtalǵan, onyń ústine, rota komandırleri ár soldaty úshin basymen jaýap beredi. Sondyqtan, Qarýly Kúshterde álimjettik ornap tur dep aıtýǵa bolmaıdy»,-dedi sózin túıindegen ol.
