Sońǵy eki jylda elimizde jol apatynan qaza bolǵandar sany 5 myń 308 adamdy quraǵan
ASTANA. QazAqparat - Sońǵy eki jylda elimizde jol apatynan qaza bolǵandar sany 5 myń 308 adamdy quraǵan. Búgin Parlament Senatynyń jalpy otyrysynda depýtat Bektas Beknazarov sońǵy jyldardaǵy elimizdiń joldaryndaǵy apattylyq máselesine alańdaýshylyq bildire otyryp, osylaı málim etti.
Senatordyń aıtýynsha, 2014-2015 jyldary respýblıkamyzdyń joldaryndaǵy oryn alǵan jol-kólik apatynan 55 myńnan astam adam japa shegip, 5 myń 308 adam kóz jumǵan.
«Mas kúıinde kólik júrgizgen júrgizýshiler sanynyń sońǵy jyldary ósip otyrǵany erekshe alańdatady. Dál osy ishimdik iship, jol-kólik oqıǵasyn týdyrǵan júrgizýshiler kinásinen japa shegýshiler qaıǵyly saldarǵa ushyrap jatady. Atap aıtqanda, Іshki ister mınıstrliginiń málimetteri boıynsha avtokólikterdi mas kúıinde basqarý dınamıkasy sońǵy bes jylda ósip otyr. Máselen, 2011 jyly ishimdik ishken kúıi kólik júrgizgen - 260 fakt, 2012 jyly - 424, 2013 jyly - 584, 2014 - 502, 2015 jyly - 498 oqıǵasy tirkelgen. Al bundaı quqyq buzýshylyqtyń negizgi kórsetkishi tirkelmeı qalatyny da, olardyń qoǵamǵa asa qaýip týdyratyny da túsinikti», - dedi senator B. Beknazarov.
Soǵan baılanysty depýtat mundaı jaǵdaı ishimdik iship, esirtkige elikken kúıi kólik basqarǵan júrgizýshiler jaýapkershiligin arttyratyn birqatar uıymdastyrýshylyq sharalaryn qabyldaýdy talap etetinin jetkizdi. «Eger jaǵdaı odan da túzelmese, onda qatal sharalar qabyldaýǵa kóshý kerek», - dedi senator.
