Sońǵy eki jylda avtorlyq quqyqtar jónindegi qoǵamdarǵa kelip túsken qarjynyń 58 paıyzy ǵana quqyq ıelenýshilerge tólendi - Bas prokýratýra
ASTANA. 18 tamyz. QazAqparat /Rýslan Ǵabbasov/ - Sońǵy eki jylda avtorlyq quqyqtardy qorǵaý jónindegi qoǵamdarǵa kelip túsken qarjynyń 58 paıyzy ǵana quqyq ıelenýshilerge tólendi.
Bul týraly búgin Astanada ótken brıfıngte Bas prokýratýranyń resmı ókili Jandos Ómirálıev málim etti.
Onyń sózine qaraǵanda, zańnamalarda avtorlyq qoǵamdardyń paıdasyna ustap qalatyn qarajattyń belgilengen paıyzdyq kólemin kórsetetin normalar joq. Óz kezeginde bul atalǵan qoǵamdarǵa kelip túsken qarjyny óz qalaýlary boıynsha jumsaýǵa múmkindik berip otyr.
«Tekserý barysynda sońǵy eki jylda avtorlyq qoǵamdarǵa kelip túsken 896,5 mln. teńgeden avtorlarǵa nebári 521,5 mln. teńgesi ǵana tólendi (58 paıyzy). Al qalǵan 375 mln. teńgeni (42 paıyzy) atalǵan qoǵamdar óz qajettiligine jumsaǵan»,-dedi resmı ókil.
«Quqyq ıelenýshiler men avtorlyq qoǵamdar arasynda jasalǵan sharttarǵa sáıkes, avtorlyq qoǵamdar kórsetken qyzmetteri úshin kelip túsken syıaqylardyń 15-25 paıyzyn alatyny, al qalǵan qarjyny quqyq ıelenýshilerge tóleıtinderi anyqtaldy»,- dep atap ótti ol.
Tekserý sharalary kórsetkendeı, qazirgi qoldanystaǵy tetikter is júzinde avtorlarǵa olardyń zııatkerlik eńbek obektilerin paıdalanǵany úshin tıisti syıaqy alýyna kepildik bermeı otyr. Atap aıtqanda, búginde elimizde avtorlardyń múddesin bildirý maqsatynda 7 avtorlyq qoǵamdyq uıymdar jumys jasaýda.
Aıta keteıik, jaqynda QR Bas prokýratýrasy zııatkerlik menshik salasyndaǵy tekserý barysynda 3,5 myńnan astam zań buzýshylyqty anyqtady.
