Sońǵy eki jylda Astanada turǵyn úı qurylysyna qatysty 20 qylmystyq is tirkelip, 16 adam sottaldy

ASTANA. QazAqparat - Bas prokýror Berik Asylovtyń tóraǵalyǵymen úlestik qurylystyń problemalyq máseleleri boıynsha vedomstvoaralyq keńes ótti, dep habarlaıdy QazAqparat.

Keńeste Berik Asylov árbir otbasy óz baspanasyn armandaıtynyn, sol úshin jyldar boıy páterge qarajat jınaıtynyn nemese nesıe rásimdeıtinin atap ótti. Bul rette josyqsyz qurylys salýshylar azamattardy tómen baǵamen jeliktirip, olardy aldaýda. Nátıjesinde úleskerler aqshasyz jáne baspanasyz qalyp jatyr.

Bul týraly jyl basynda Memleket basshysymen elordany damytý jónindegi keńeste de aıtylǵan bolatyn. Prezıdent sáýlet jáne qurylys salasyndaǵy baqylaýdy kúsheıtýdiń, qurylys kompanııalarynyń jaýapkershiligin qatańdatýdyń jańa tásilderin kózdeýdi tapsyrǵan.

Qadaǵalaý organynda sońǵy eki jylda 20 qylmystyq is tirkelip, 16 adam sottalǵany ataldy. Olar 30 mlrd teńgeden astam shyǵyn keltirgen. 300-den astam kompanııa zańsyz alymdar úshin 250 mln teńge aıyppulǵa ákimshilik jaýaptylyqqa tartyldy.

Sonymen qatar qazir elimizde 44 úıdi salynyp bitip qaldy. Olardyń kópshiligi elordada (16 turǵyn úı) jáne memleket esebinen qarjylandyrylýda.

Bas prokýror qurylys salýshylardyń aldyn ala ınvestıtsııalar jáne t.b. sharttar arqyly zańdy aınalyp ótip, azamattardyń qarajatyn tartý boıynsha zańsyz áreketterine nazar aýdardy. Zań aıasynda qurylys salýshylar úleskerlerdiń aqshasyn eki jaǵdaıda ǵana tarta alady.

Birinshisi - Qazaqstan turǵyn úı kompanııasymen kelisim-shart bolǵan kezde.

Ekinshisi - ákimdiktiń ruqsaty bolǵan jaǵdaıda.

Eger jobaǵa bank qatyssa nemese úıdiń qańqasy bolsa, ákimdiktiń ruqsaty beriledi.

Sondaı-aq, jańa zańda sharttyń ataýymen manıpýlıatsııalar jasaý jaǵdaıy alynyp tastaldy. Sondyqtan azamattardyń qarajatyn tartý úshin qurylys salýshylar turǵyn úı qurylysyna úlestik qatysý týraly shart jasasýy qajet.

Bas prokýror Qurylys isteri komıtetine problemalyq turǵyn úılerdiń biryńǵaı reestrin olardy iske qosylýyna deıin baqylaý úshin ázirleýdi tapsyrdy.

Elordalyq ákimdiktiń aldyna problemaly úılerdiń qurylysyn aǵymdaǵy jyldyń sońyna deıin aıaqtaý mindeti qoıyldy.

Óz kezeginde Indýstrııa mınıstrligine qurylys salýshylarǵa qatysty memlekettik baqylaýdy kúsheıtý qajet.

Keńes sońynda qadaǵalaý vedomstvosynyń basshysy qyzmetkerler men baqylaýshy organdarǵa qurylys kompanııalarynyń is-áreketterin muqııat qadaǵalaýdy tapsyrdy. Eger buzýshylyqtar anyqtalsa, azamattar zardap shekpeýi úshin tez áreket etýdi talap etti.