Sońǵy eki aptada 440 jup mobıldi qosymsha arqyly neke qıdyrǵan

ASTANA. QazAqparat – Mobıldi qosymsha kómegimen nekeni tirkeý qyzmeti iske qosylǵaly eki apta ishinde 400-den astam jup ótinim bergen. Bul týraly Ádilet vıtse-mınıstri Bekbolat Moldabekov málim etti, dep habarlaıdy QazAqparat tilshisi.

«Qazirgi málimetti naqty bilmeımin. Biraq mobıldi qosymsha arqyly neke qııýǵa ótinish berý bastalǵaly eki apta ishinde 440 jup Halyk bank mobıldi qosymshasy arqyly tirkeldi. Búginde atalǵan qosymshanyń kerek ekendigine kózimiz jetip otyr», – dedi Bekbolat Moldabekov Ortalyq kommýnıkatsııalar qyzmeti alańynda ótken baspasóz máslıhatynda.

Vıtse-mınıstrdiń aıtýynsha, neke qııýmen qatar basqa da memlekettik qyzmetterdi mobıldi qosymshanyń kómegine júginýge bolady.

«Basqa da bankterdiń mobıldi qosymshasy arqyly tirkeýge bolady. Aldaǵy ýaqytta mobıldi qosymshany maksımaldy túrde engizetin bolamyz», - dep tolyqtyrdy ol.

Aıta ketsek, 2 aqpanda Ádilet mınıstrliginiń resmı ókili Talǵat Ýálı qazaqstandyqtar mobıldi qosymsha arqyly neke qııýdy tirkeýge ótinish bere alatyndyǵy týraly aıtqan.