Sońǵy bir jarym jylda áýe baǵyttardyń keshiktirilýinen Qazaqstanda 60 myńnan astam jolaýshynyń quqyǵy buzyldy
ASTANA. 14 qazan. QazAqparat - 2010 jyl men 2011 jyldyń birinshi jarty jyldyǵynda áýejaılarda áýe baǵyttardyń keshiktirilýinen Qazaqstanda 60 myńnan astam jolaýshynyń quqyǵy buzyldy. Bul týraly Kóliktegi bas prokýratýradan málim etti.
13 qazan kúni Kólik jáne kommýnıkatsııa mınıstrligi, «Qazaqstan temir joly» Ulttyq kompanııasy» AQ men onyń enshiles kompanııalarynyń sondaı-aq, áýekompanııalar men áýejaılar basshylyǵynyń qatysýymen Kóliktegi bas prokýratýranyń alqa májilisi ótip, onda áýe jáne temirjol kólikteri tutynýshylarynyń quqyǵyn qamtamasyz etýge baǵyttalǵan zańnamanyń qoldanylýyna júrgizilgen tekseristiń nátıjesi talqylandy
Tekseris nátıjesinde áýe jáne temirjol kólikterinde jolaýshylar men júkterdi tasymaldaý barysynda zańnamanyń júeıli túrde buzylyp otyratyny aıǵaqtaldy.
Avıatsııalyq kólikpen tasymaldaýdy júzege asyrýda túıitkildi másele áýe baǵyttarynyń kesteden keshiktirilýi bolyp otyr. «Bul Almaty qalasynyń áýejaıynda áýe baǵyttardyń táýlik boıyna birqalypty bólinbeýinde, onyń qýatynyń jetkiliksizdiginde, óńirlik áýejaılar ınfraqurylymynyń damytylmaýynda, rezervtik áýe kemelerdiń jetkiliksizdiginde bolyp otyr. áýejaılarda áýe baǵyttarynyń keshiktirilýi saldarynan 2010 jyl men 2011 jyldyń birinshi jartyjyldyǵynda 60 myńnan astam jolaýshynyń quqyǵy buzyldy. Sondaı-aq, Almaty, Semeı jáne Petropavl qalalarynyń áýejaılarynda múmkindikteri shekteýli jolaýshylarǵa arnalǵan arnaıy tehnıkalyq qurylǵylar bolmaı shyqty», - delingen taratylǵan habarlamada.
Onymen birge, málim bolǵandaı, áýetasymaldaýshylardyń vedomstvolyq aktilerinde jolaýshylardyń zańmen qarastyrylǵan quqyqtaryn shekteıtin normalar anyqtaldy.
Kóliktegi bas prokýratýra tutynýshylardyń quqyqtaryn óreskel buzýshylyqtardy temirjol kólikterinde de anyqtady. Atap aıtqanda, jolaýshylar vagondarynyń tozyǵy ábden jetken, al olardyń sany halyqtyń suranysyn qanaǵattandyrýǵa jetkiliksiz. Jazǵy aılarda vagondarda kondıtsıonerler jumys istemeıdi, kóp jaǵdaıda olar antısanıtarııalyq kúıde bolady. Temirjol bıletteriniń udaıy tapshylyǵy adamdardy deldaldarǵa júginýge májbúrleıdi. Onymen birge, eldegi 284 vokzaldyń 160-y qanaǵattanarlyqsyz, 32-si apatty jaǵdaıda tur.
«Temir joldarda ústimizdegi jyldyń 7 aıynda jalpy ýaqyty 1200 saǵat bolatyn 1000 keshiktirý oryn aldy. Qarapaıym sanıtarlyq erejelerdi saqtamaý bıyl Almaty-Atyraý baǵytyndaǵy poıyzdyń vagon-meıramhanasynda 39 balanyń ýlanýyna ákelip soqtyrdy. Quzyrly memlekettik organdardyń qadaǵalaýy jetkiliksiz deńgeıde júrgizilýde», - delingen.
Kóliktegi bas prokýratýranyń baspasóz qyzmetinen málim etkendeı, tutynýshylar quqyqtarynyń qorǵalýyna qadaǵalaý júrgizetin memlekettik organdar kóp jaǵdaıda zańnyń buzylýyna ózderi yqpal etedi nemese soǵan ıtermeleıdi. Tekseristerdiń nátıjesi boıynsha 100-den astam qadaǵalaý aktisi toltyrylyp, ártúrli jaýapkershiliktiń túrine 200-den astam tulǵa tartyldy.
