Sońǵy bes jylda túrmedegilerdiń ólim kórsetkishi 30 paıyzǵa azaıdy - ІІM
ASTANA. QazAqparat - Sońǵy bes jylda túrmedegilerdiń ólim kórsetkishi 30 paıyzǵa azaıdy. Búgin Májiliste Qylmystyq-atqarý júıesindegi máselelerge arnalǵan Úkimet saǵatynda QR Іshki ister mınıstri Qalmuhanbet Qasymov osylaı aıtty.
«Qylmystyq atqarý júıesindegi medıtsına máselesinde eń basty problema - týberkýlezden emdeý jáne aldyn alý. Bul baǵyttaǵy jumystarda jaǵymdy kórsetkishter barshylyq. Máselen, týberkýlezden bolatyn ólim 68 paıyzǵa azaıdy, al osy dertpen aýyratyn sottalýshylar sany 31 paıyzǵa qysqardy. Bıyl osy máselege baılanysty Pavlodar oblysynda arnaıy mamandandyrylǵan túrme mekemesin japqan bolatynbyz», dedi mınıstr.
Onyń aıtýynsha, qazir túrmege túsetinderdiń ózi «syrttan» neshe túrli aýrýlar juqtyryp ákeledi. Máselen, ótken jyly túrmege «qabyldaýlar» barysynda AQTV juqtyrǵan 447 sottalýshy anyqtalǵan. Sonymen qatar, byltyr túrmede jazasyn óteýge kesilgenderdiń 1500-i esirtkige táýeldi bolsa, 1800-inde basqa aýrý túrleri anyqtalǵan. Sonyń ishinde tórt júzge jýyǵy týberkýlezdiń ashyq túrine shaldyqqandar bolyp shyqty, alaıda olardyń basym bóligi densaýlyq saqtaý organdarynda esepte turmaıtyny anyqtaldy.
«Bir sózben aıtqanda, byltyr sottalǵandardyń otyz paıyzǵa jýyǵy syrqattar boldy», dedi Q. Qasymov.
