Sońǵy bes jylda sanavıatsııa qyzmeti toǵyz myńǵa tarta adamdy qutqarǵan

ASTANA. QazAqparat - Sońǵy bes jyl ishinde sanıtarlyq avıatsııa qyzmeti 8,5 myń adamdy ólimnen qutqarǵan. Bul týraly búgin Ortalyq kommýnıkatsııalar qyzmetinde «Otandyq densaýlyq saqtaý salasynyń úzdik dástúrleri - medıtsına qyzmetkerleri eren eńbeginiń jemisi» taqyrybynda ótken brıfıngte QR Densaýlyq saqtaý jáne áleýmettik damý vıtse-mınıstri Alekseı Tsoı málim etti.

«Sońǵy bes jyl ishinde sanıtarlyq avıatsııa qyzmeti Qazaqstan boıynsha 6,7 myń ret aımaqtarǵa ushyp, qatty aýyryp jatqan adamdardy qutqarǵan. Dárigerler jol kótere almaıtyn naýqastardy sol shalǵaı aýyldarda operatsııa jasap, aman alyp qalǵan. Jalpy, bes jyldyń qorytyndysyna súıensek, sanıtarlyq avıatsııa 8,7 myń adamdy, sonyń ishinde 1,5 myń júkti jáne jas anany, úsh myńnan asa balany qutqarǵan»,-dep habarlady A.Tsoı.

Onyń aıtýynsha, 2015 jyly QR Densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasyn júzege asyrý aıaqtaldy. Baǵdarlamanyń arqasynda qazaqstandyqtardyń ómir súrý deńgeıi 71,8 jasqa jetti, halyqtyń negizgi densaýlyq jaǵaıynyń kórsetkishteri artty, ana men sábı óliminiń ń kórsetkishi 1,8 esege azaıyp,  jalpy ólim kórsetkishi 16,2%-ǵa azaıdy. Qaterli isik aýrýlarynan bolatyn ólim-jitim 15,4%-ǵa, týberkýlezden kóz jumatyndardyń jalpy sany  2,8 esege  azaıǵan.