Sońǵy bes jylda Qazaqstanǵa syrttan kelgen jumysshylar sany 3 eseden astam ósti - Májilis depýtaty
ASTANA. Qarashanyń 12-si. QazAqparat /Aıdar Ospanalıev/ - Elimizdiń kóshi-qon salasyndaǵy zańdaryn jetildirýge degen qajettilik respýblıkaǵa syrttan keletin jumys kúshteriniń artýymen baılanysty. Sońǵy bes jylda Qazaqstanǵa syrttan kelgen jumysshylar sany 3 eseden astam ósti.
Bul elimizde kóptegen iri ınvestıtsııalyq jobalardyń júzege asyrylýymen baılanysty dep túıindeýge bolady. Bul pikirdi búgin Astanada ótip jatqan «Qazaqstan Respýblıkasyndaǵy jumysshylardyń kóshi-qon protsesin tıimdi basqarý - jumysshy mıgranttardyń quqyqtaryn qorǵaýdaǵy kásipodaqtardyń atqaratyn róli» atty dóńgelek ústel otyrysynda Májilis depýtaty Svetlana Ferho bildirdi, dep habarlaıdy QazAqparat.
Depýtattyń sózinshe, elimizge jyl saıyn shamamen 300 myń adamǵa deıin jumys kúshi tartylady. Bulaı bolatyn sebebi sońǵy jyldary elimiz kórshiles memleketterdiń eńbek mıgranttary úshin tartymdy bolyp otyr. Álemdik qarjy daǵdarysy Qazaqstandy da sharpydy. Soǵan qaramastan Qazaqstanǵa kúnkóris qamymen keletin kórshi eldiń azamattarynan tynym joq. «Bul jaǵdaı, árıne bizdiń eńbek naryǵymyzǵa ózindik zardabyn tıgizip otyr. Ol ásirese arnaıy bir mamandyǵy joq jumyssyzdardyń jaǵdaıyna erekshe áser etýde. Nátıjesinde nápaqa tabatyn tirlik taba almaı qalǵan elimizdiń azamattarynyń áleýmettik jaǵdaıy barynsha qıyndap barady. Eńbek mıgranttary qazaqstandyqtar úshin úlken básekeles bolyp otyr. Óıtkeni olar jumysty da oǵan jasalatyn jaǵdaıdy da, tólenetin aqshany da talǵamaıdy. Osyǵan oraı qazir álemde eńbek mıgranttaryna arzan jumys kúshi retinde qaraý úderisi qalyptasty», dedi halyq qalaýlysy.
Onyń aıtýynsha, shetten kelgen eńbekshilerdiń quqyqtary álsiz qorǵalýda. Eńbek mıgratsııasy álemdik tájirıbede qalypty jaǵdaı. Degenmen ol órkenıetti túrde, ulttyq zańdylyqtar men halyqaralyq normatıvtik-quqyqtyq aktiler negizinde júzege asyrylýy tıis.
