Sońǵy bes jylda Qazaqstandaǵy kólikter sany 4 mln. birlikke jetti
ASTANA. 1 sáýir. QazAqparat - Elimizde sońǵy bes jylda kólikter sany 4 mln. birlikke jetti. Búgin Parlament Májilisinde kólik ınfraqurylymyn damytý máselelerine arnalǵan Úkimet saǵatynda Ekonomıkalyq damý jáne óńirlik reforma komıtetiniń tóraǵasy Seıitsultan Áıimbetov osylaı aıtty.
«Jalpy kólik sanynyń 80 paıyzdan astamynyń paıdalaný merzimi 7 jyldan asqan. Bul rette jolaýshylardy avtokólikpen tasymaldaý úlesi 99 paıyzdy quraıtynyn eske sala ketkim keledi. Osyǵan baılanysty respýblıkalyq jergilikti mańyzy bar avtokólik joldaryn salý jáne jóndeý kezinde oryndalatyn jumystar men materıaldar sapasyn barynsha baqylaýdy kúsheıtý qajet», - dedi komıtet tóraǵasy.
Onyń aıtýynsha, bul baǵytta jol qozǵalysy qaýipsizdigi aýdıti ınstıtýtyn engizý, qoǵamdyq baqylaý júıesin damytýdyń mańyzy zor. Al buǵan «Batys Eýropa-Batys Qytaı» halyqaralyq dáliziniń qurylysyn da úlgi etip alýǵa bolady. Óıtkeni, depýtattyń sózine qaraǵanda, elimizde avtokólik joldarynyń júktemesi jyl saıyn ósip otyr. Budan bólek, S. Áıimbetov aýyldar men eldi mekenderdi kólikpen qamtamasyz etý problemasyn sheshetin ýaqyt jetkenin atap ótti. Onyń sózine qaraǵanda, búgingi kúni 2 myńǵa tarta aýyldyq eldi mekende, nemese olardyń 30 paıyzynda jyl boıyna qyzmet kórsetetin irkilissiz kólik qatynasy bolmaı otyr.
Buǵan qosa, 6 myń 938 aýyldy eldi mekenniń 900-ge jýyǵynda tipti qatty tósemderi bar kirme jol da joq.
«Halyqty ómirlik mańyzy bar áleýmettik qyzmettermen qamtamasyz etý, óńirlik sharýashylyq baılanystardy jalpy júıege yqpaldastyrý maqsatynda shalǵaıdaǵy eldi mekenderdi sapaly kólik ınfraqurylymmen qamtamasyz etý qajet», - dedi S. Áıimbetov.
