Sońǵy bes jylda eń tómengi deńgeıde eńbekaqy alatyndar 30 paıyzǵa azaıdy - Dúısenova
ASTANA. QazAqparat - Ekonomıkanyń bazalyq salalarynda jumys berýshiler eńbek úshin ústeme jumysqa eki ese joǵary kólemde tólep jatyr.
Bul týraly QR Eńbek jáne halyqty áleýmettik qorǵaý mınıstri Tamara Dúısenova Májilistegi Úkimet saǵatynda málim etti, dep habarlaıdy QazAqparat.
«Búginde eń tómengi eńbekaqyny belgileý rásimin qurý týraly Qazaqstan ratıfıkatsııalaǵan Halyqaralyq eńbek uıymy konventsııasynyń erejesin júzege asyrýdamyz. Jalaqyny tómen mólsherde alatyn jumysshylardyń sanyna júıeli túrde monıtorıng júrgizilýde. Monıtorıng nátıjesi boıynsha sońǵy bes jylda eń tómengi deńgeıde eńbekaqy alatyn adamdardyń sany 30 paıyzǵa azaıdy. Eńbekti tóleýdiń eń tómengi standarttary mólsheri boıynsha túngi ýaqyttaǵy, demalys jáne meıram kúnderdegi jumys aıasynda Eńbek kodeksin ázirleý men talqylaý barysynda kóp pikir aıtylǵan bolatyn. Ujymdyq sharttar men ekonomıkanyń bazalyq salalaryndaǵy kásiporyndarda eńbekti tóleý júıesine jasalǵan monıtorıng áleýmettik dıalogtyń qısyndylyǵyn kórsetti. Búginde olar atalǵan tólemdi eki ese joǵary kólemde belgilegen. Al jumysshynyń aılyq eńbekaqysy mólsherine toqtalsaq, ony jumys berýshiler qyzmetkeriniń biliktiligine qaraı, sondaı-aq oryndalatyn jumystyń qıyndyǵyn, kólemin ári sapasyn eskere otyryp belgileıdi. Osy talaptar aıasynda 2016 jyldyń 1 qańtarynan bastap azamattyq qyzmetshilerdiń eńbegin tóleýdiń jańa modeli engizilip, onyń nátıjesinde olardyń jalaqysy ortasha alǵanda 30 paıyzǵa joǵarylady»,-dedi T. Dúısenova Májilistegi Úkimet saǵatynda.
Budan bólek, mınıstr Eńbek kodeksiniń jańa modelin iske asyrýdyń negizgi qorytyndylaryn atady. Eki jylda eńbekti qorǵaý men qaýipsizdik boıynsha qoldanystaǵy 430 standartqa ınventarızatsııa júrgizilip, ońtaılandyrýǵa jatatyn standarttardyń tizimi aıqyndaldy. Qaıta qaraý nátıjesinde, 122 eńbek standarty men 11 eńbekti qorǵaý jáne qaýipsizdik standarty jańa normalarǵa sáıkes keltirildi. Eńbek standarttaryn jańartý boıynsha jumys 2021 jylǵa qaraı aıaqtalmaq.
