Sońǵy bes jylda elimizde jasóspirimder arasynda júktiliktiń 33 myń 51 faktisi tirkelgen
ASTANA. QazAqparat - Sońǵy bes jylda elimizde jasóspirimder arasynda júktiliktiń 33 myń 51 faktisi tirkelgen. Búgin Parlament Májilisiniń jalpy otyrysynda depýtat Baqtııar Máken osy máseleni kóterdi.
Depýtattyń aıtýynsha, sońǵy jyldary jańa týǵan sábılerdiń dárethanalar men qoqys úıindilerine laqtyrylyp tastalýyna qatysty oqıǵalardyń jıileýi qoǵamda úlken rezonans týdyryp otyr. Adamshylyqtan ada mundaı oqıǵa Taraz, Aqtóbe jáne Jezqazǵan qalalarynda qaıtalanǵan. Bul rette Baqtııar Máken TMD memleketteriniń aýmaǵynda jasóspirimder júktiligi indet retinde qaralatyn deńgeıge jetkenin atap ótedi. «Qazaqstandaǵy jasóspirimder arasyndaǵy júktiliktiń paıyzy Reseımen, Ýkraınamen salystyrǵanda birshama azdaý, alaıda osy másele qatty alańdatyp, qalyń oıǵa qaldyrady. Statıstıka málimetteri boıynsha elimizde áıelderdiń besten birin 18 jasqa deıingi jasóspirim qyzdar quraıdy, olardyń sany 2 mln.nan astam. Al Densaýlyq saqtaý jáne áleýmettik damý mınıstrliginiń málimeti boıynsha sońǵy bes jylda jasóspirimder arasynda júktiliktiń 33 myń 51 faktisi, oǵan qosa 15 jáne 18 jastaǵy qyzdardyń 9906 jasandy túsigi tirkelgen. Bul málimet paıyzdyq kórsetkish boıynsha Batys Eýropa elderinen eki-úsh esege artyq. Al 15 jáne 18 jas aralyǵyndaǵy qyzdardyń jasandy túsik kórsetkishteri áli kúnge joǵary, jyl saıyn eki myńǵa deıin jetedi», - dedi depýtat B. Máken.
Osy rette depýtat erte júkti bolý jasóspirim qyzdardyń densaýlyǵyna zııanyn keltirip, onyń sońy qaıǵyly jaǵdaılarǵa ulasyp jatatynyn atap ótti. Onyń aıtýynsha, 15-18 jas aralyǵyndaǵy júkti bolý oqıǵalary kóbinese ólimge soqtyrady. Máselen, damyǵan elderde jyl saıyn 70 myńǵa tarta jasóspirim kóz jumady.
«Jasóspirimder arasyndaǵy jynystyq qatynastar, erte júkti bolý men, kámeletke tolmaǵandardyń nekeleri, erte jastaǵy túsik tastaýlar, analardyń týǵan nárestesinen bas tartýy, ana men balanyń ólim-jitim kórsetkishiniń artýy, qyzdar arasyndaǵy sýıtsıdterdiń kóbeıýi osynyń barlyǵy elimizdiń demografııalyq ahýalyny keri áserin tıgizedi. Bul ulttyq deńgeıdegi másele», dedi B. Máken. Onyń aıtýynsha, buryn erte jastan júktilik máselesi negizinen jaǵdaıy tómen otbasylarda oryn alady degen túsinik bolsa, qazir jaǵdaı olaı emestigin kórsetken. Búgingi kúni áleýmettik teńsizdik te baıqalady.
«Ata-analar tarapynan tıisti nazar aýdarylmaǵan jaǵdaıda jasóspirimder sanalylyǵy tómendeıdi. Sonyń ishinde jasóspirimder arasyndaǵy júktilik jynystyq tárbıeniń durys júrgizilmeýinen de bolyp tabylady. Mundaı jaǵdaıǵa tap bolǵan qyz balalar áleýmettik qoldaýǵa zárý», - dedi depýtat.
