Sońǵy bes jylda elimizde 21 avıatsııalyq oqıǵa oryn aldy - A. Jumaǵalıev
ASTANA. 1 sáýir. QazAqparat - 2008-2013 jyldary elimizde 21 avıatsııalyq oqıǵa oryn aldy. Bul týraly búgin Parlament Májilisinde ótip jatqan Úkimet saǵatynda Kólik jáne kommýnıkatsııa mınıstri Asqar Jumaǵalıev aıtty.
«Bul rette tehnıkanyń buzylýynan - 3, syrtqy faktorlar áserinen (aýa raıynyń áseri, qustardyń kedergi bolýy) - 3, al ushý tehnıkasy erejelerin buzǵandyqtan, ıaǵnı adam faktorynan 15 oqıǵa oryn alyp otyr. Osyǵan oraı, ushýlarda adam faktorynan bolatyn jaǵdaılardy tómendetý maqsatynda ushý qaýipsizdigin qamtamasyz etý jáne qaýipsizdik jumysyn qadaǵalaý úshin byltyr Úkimet basshysynyń ókimimen IKAO aýdıtiniń eskertpelerin joıý jóninde vedomstvoaralyq jospar bekitilgen. Sonymen birge, IKAO-nyń Tehnıkalyq yntymaqtastyq bıýrosymen tehnıkalyq jáne keńes berý týraly kelisim jasaldy», - deıdi A. Jumaǵalıev.
Mınıstrdiń aıtýyna qaraǵanda, búgingi kúni Májiliste kólik máselelerine ózgerister engizý týraly zań jobasy talqylanyp jatyr. Onda da avıatsııaǵa qatysty ózgerister engizý qaralady. «Bul ózgerister elimizdiń ushý qaýipsizdigin qamtamasyz etý talaptarynyń IKAO halyqaralyq standarttaryna saı bolýyn qarastyrady», -dedi A. Jumaǵalıev.
