Sońǵy bes jylda bas bostandyǵynan aıyrý oryndarynda týberkýlezge shaldyqqandar sany 50 paıyzǵa kemidi - A.Shpekbaev
ANA. 10 jeltoqsan. QazAqparat /Aıdar Ospanalıev/ - Elimizdiń qylmystyq atqarý júıesindegi medıtsınalyq-sanıtarlyq qyzmetti jetildirý baǵytynda qolǵa alynǵan sharalar sońǵy 5 jylda bas bostandyǵynan aıyrý oryndarynda týberkýlezge shaldyqqandar sanyn 50 paıyzǵa kemitýge múmkindik berdi.
Bul týraly búgin Astanada ótip jatqan «Quqyq qorǵaý organdaryn reformalaý kezinde qylmystyq -atqarý júıesiniń qyzmetin jetildirý» atty dóńgelek ústel otyrysynda Prezıdent Ákimshiliginiń Quqyq qorǵaý júıesi bóliminiń meńgerýshisi Alık Shpekbaev málim etti.
Onyń sózine qaraǵanda, bas bostandyǵynan aıyrý oryndaryndaǵy týberkýlez aýrýynyń azaıýyna baılanysty ondaǵy azamattardyń ólim kórsetkishteri de tómendep otyr. «Búgin elimizdiń qylmystyq-atqarý júıesi halyqaralyq jáne ulttyq quqyq qorǵaý uıymdarymen belsendi qarym-qatynasta. Sondaı-aq atalmysh júıe bas bostandyǵynan aıyrý oryndarynda otyrǵandardyń quqyqtaryn qamtamasyz etý máselesine qatysty azamattyq qoǵam ókilderimen de tyǵyz baılanysta. Keńes Odaǵy ydyraǵan ótpeli kezeńde qylmystyq atqarý júıesiniń qandaı kúıde bolǵandyǵy barshaǵa málim. Al odan bergi ýaqytta, menińshe bul salada eleýli ózgerister boldy. Buny aıtpaı ketýge bolmaıdy», - dedi A.Shpekbaev.
Onyń aıtýynsha, elimizde ólim jazasyna tyıym salynǵan. Al Elbasynyń bas bostandyǵynan aıyrý sharalaryn múmkindiginshe balamaly jaza túrlerimen almastyrý jónindegi tapsyrmalarynan keıin, ıaǵnı bıylǵy jyldyń 9 aıynyń ózinde túrmedegiler sany 5 myń adamǵa nemese 8 paıyzǵa kemidi. «Qazir elimizde bas bostandyǵynan aıyrý oryndaryndaǵy azamattardyń múddeleri men quqyqtaryn qorǵaý maqsatynda zań júzinde bekitilgen qoǵamdyq baqylaý qyzmeti jumys isteıdi. Elimizdiń ár oblysynda osy mindetterdi júzege asyratyn qoǵamdyq baqylaý komıssııalary bar. Osy oraıda aıta ketetin jáıt, kezinde mundaı máseleler qoǵamnyń talqysyna salynbaıtyn. Al búgin biz eldegi úkimettik emes uıym ókilderimen birlesip, ońdy jetistikter jóninde sóz ete bastadyq», - dedi Prezıdent Ákimshiliginiń ókili.
