Sońǵy bes jylda 380-nen astam qazaqstandyq shetelde tegin em aldy
Bul týraly QR Densaýlyq saqtaý jáne áleýmettik damý mınıstrliginiń baspasóz qyzmetinen habarlandy.
Qazaqstandyqtardy tegin medıtsınalyq kómekpen qamtamasyz etý maqsatynda 2011 jyly QR Densaýlyq saqtaý mınıstrligi janynan azamattardy shet elderge emdelý úshin jiberý jáne QR azamattaryn bıýdjet qarajaty esebinen shet elderge emdelýge jiberýdiń erejelerin bekitý máseleleri jónindegi jumys organy qurylǵan bolatyn. Qoldanystaǵy erejelerge sáıkes, Qazaqstan azamattarynyń birqatar sanattaryn shet elderde emdeý qarastyrylady.
«2011 jyly shetelge qazaqstandyq 78 naýqas (17 eresek, 61 bala), 2012 jyly - 64 (17 eresek, 47 bala), 2013 jyly - 64 (18 eresek, 46 bala), 2014 jyly - 70 (45 eresek, 25 bala), 2015 godý - 57 (30 eresek, 27 bala) em qabyldaý úshin jiberildi. Aǵymdaǵy jyly óńirlerden naýqastardy shet elderde emdeýge qatysty 176 usynym jasaldy. Osyǵan baılanysty Qazaqstan azamattaryn sheteldik medıtsınalyq mekemelerge joldaý jónindegi komıssııanyń 11 otyrysy ótip, 52 patsıentti jiberý maquldanǵan. 12 patsıentti emdeý Qazaqstandaǵy sheberlik-synyptary aıasynda júrgiziledi, al 80 naýqasqa em-dom Qazaqstannyń medıtsınalyq uıymdarynda jasalmaq. Qalǵan usynym-hattar qaralý ústinde», - delingen baspasóz baıanynda.
Aıta keterligi, sońǵy jyldary qazaqstandyqtarǵa jańa ári qymbat medıtsınalyq tehnologııalar shet elderde ǵana emes elimizdiń ishinde de qoljetimdi bola bastady. Máselen, 2010 jyly respýblıkamyzda dıagnostıka men emdeýdiń 40 jańa tehnologııasy engizilgen. 2015 jyly bulardyń sany 120-dan asty.