Sońǵy bes jylda 1,3 mlrd. AQSh dollaryna eksporttyq kelisimshart jasaldy - «KAZNEX INVEST»
ASTANA. 15 qańtar. QazAqparat - Sońǵy bes jylda 1,3 mlrd. AQSh dollaryna eksporttyq kelisimshart jasaldy. Bul týraly búgin "KAZNEX INVEST" Ulttyq agenttigi eksporttyq taldaý departamentiniń dırektory Qanat Qojamqulov málim etti.
«Servıstik kómektiń arqasynda sońǵy bes jylda 1,3 mlrd. AQSh dollaryna kelisimshart jasaldy. Bıýdjetten bólingen 1 AQSh dollaryna 61 dollar eksporttyq kelisimsharttar alyp keldi. Qarjylyq kómek tikeleı kásiporynǵa berilmeıdi, biraq eksporttaýshy sheteldik naryqqa shyǵý barysynda jumsalǵan shyǵyndardyń 50 paıyzy memleket tarapynan bizdiń agenttik arqyly óteledi. Basty talap - eksportty rastaıtyn qujattary bolýy kerek jáne óńdelgen taýarlar tizimine sáıkestigi bolýy shart», - dep atap ótti ol.
Aıta keteıik, KAZNEX shıkizattyq emes eksportty damytý jáne ilgeriletý júıesiniń ulttyq operatory bolyp tabylady.
