Sońǵy bes jyl ishinde jasóspirimder arasyndaǵy qylmys 27 paıyzǵa tómendegen - ІІM Qylmystyń aldyn alý qyzmeti basqarmasynyń bastyǵy
ALMATY. Mamyrdyń 21-i. QazAqparat /Ádilet Musahaev/ - Sońǵy bes jyl ishinde jasóspirimder arasyndaǵy qylmys 27 paıyzǵa tómendegen.
Bul jaıynda ІІM Qylmystyń aldyn alý qyzmeti basqarmasynyń bastyǵy Qanybek Jaqsyǵalıev búgin ótken mektep ınspektorlary polıtsııasy jumysynyń tıimdiligi jónindegi dóńgelek ústel barysynda aıtty, dep habarlaıdy QazAqparat.
Q.Jaqsyǵalıevtyń aıtýynsha, ІІM-gi jáne basqa da qoǵamdyq uıymdar men birlese otyryp jasaǵan sharalar arqasynda jasóspirimder arasyndaǵy qylmys kórsetkishi tómendegen. «2004 jyly 6500 jasóspirim qylmys jasaǵan bolsa, 2009 jyly bul kórsetkish 4 myńǵa jetip otyr. Al bıylǵy tórt aıdyń qorytyndysy boıynsha jasóspirimder qylmysy 14,8 paıyzǵa azaıdy. Munymen qatar mektep aýmaǵynda jasalatyn qylmystar eki esege tómendep, mektep oqýshylarynyń jasaǵan qylmystarynyń sany anaǵurlym kemidi», deıdi Qanybek Jaqsyǵalıev.
Sondaı-aq ol qazirgi ýaqytta Respýblıka boıynsha 17 myńdaı jasóspirim jáne 20 myńdaı jaǵdaıy qolaısyz otbasylardyń balalary tirkeýde turǵandyǵyn aıtyp ótti. «Esepte turǵan jasóspirimderdiń jazǵy ýaqytyn tıimdi ótkizýine jáne olardy sport pen basqa da túrli jumystarmen shuǵyldanýyna jaǵdaı jasaýymyz kerek. «Bilim jáne ǵylym mınıstrligi men týrızm mınıstrligi jastardyń bos ýaqytyn tıimdi ótkizýi men lagerlerge jiberý jaǵdaılaryn qaraýda. Basqa da memlekettik uıymdar sııaqty biz de atsalysamyz», deıdi Q.Jaqsyǵalıev.
Sonymen qatar ol ІІM men Bilim jáne ǵylym mınıstrliginiń mektep ınspektorlarynyń qyzmeti jáne olardyń atqaratyn jumysy jaıynda buıryǵy daıyndalyp jatqandyǵyn atap ótti.
Jıyn barysynda jazǵy demalys kezeńindegi quqyq buzýshylyqtyń aldyn alý men polıtsııa mektep ınspektorlarynyń oqýshylar arasyndaǵy qylmysyn boldyrmaý jaılary talqylanyp, baıandamalar oqyldy.
